"დღეს ამ არხზე ჩემს 20 - წლიან ისტორიას ვასრულებ... ბოლო გავდივარ" - მაია ასათიანი "რუსთავი 2"-იდან მიდის და მაყურებელს ატირებული ემშვიდობება

"პროფილი" დაიხურა და დღეს "რუსთავი 2"-ის ეთერში ბოლო გადაცემა გავიდა. ტელეკომპანიას ტოვებს მაია ასათიანიც, რომელიც არხზე 20 წლის განმავლობაში მუშაობდა.

ტელეწამყვანი მაყურებელს ბოლო ეთერის საშაულებით ემოციურად დაემშვიდობა.

"როდესაც ეს ტელევიზია ინგრეოდა, ჩემს თავს და "რუსთავი 2"-ელებს პირობა მივეცი, რომ ვიქნებოდი ბოლო ვინც ამ ფასეულობისთვის იბრძოლებდა, რასაც "რუსთავი 2" ჰქვია. "რუსთავი 2" კედლები არ არის, ეს არის ფასეულობები და ამ ფასეულობის გარშემო გაერთიანებული ადამიანები. პირობა შევასრულე. ბოლო გავდივარ აქედან.

დღეს მე აქ ამ არხზე, ჩემს 20-წლიან ისტორიას ვასრულებ. ბოლო გავდივარ, რადგან აქ იმ სინათლეს, წლების წინ მთელი საქართველოს მთავარი იმედი რომ იყო, ვეღარ ვხედავ. დღეს ბოლო "პროფილია". ეს გადაცემა ერთი კვირის წინ ჩაიწერა და მაშინ ვერც კი წარმოვიდგენდი, რომ ეს ბოლო იქნებოდა. მივდივარ იმიტომ, რომ იძულებული ვარ წავიდე. მივდივარ იმიტომ, რომ საბრძოლველი არაფერია" - ამბობს მაია ასათიანი.

შეგახსენებთ, ამ ცოტა ხნის წინ ცნობილი გახდა, რომ პანდემიის გამო გამოწვეული ეკონომიკური სირთულისა და არხის რეიტინგის შემცირების გამო "რუსთავი 2"-ში სტრუქტურული რეორგანიზაცია გამოცხადდა. ერთ-ერთი ვერსიით, შესაძლებელი იყო კომპანია გაკოტრებულადაც გამოცხადებულიყო.

მოგვიანებით, გავრცელდა ინფორმაცია, რომ ტელეკომპანია "რუსთავი 2" და "პრაიმ თაიმი" ერთ ჰოლდინგად ერთიანდებიან, რაც კომპანიების წარმომადგენლებმა დაადასტურეს.