ავტორი:

"ექიმი, რომელიც ამტკიცებდა, რომ მეგი ბაქრაძეს "ადრენალინი" გაუკეთა, აღიარებს, რომ იცრუა და ადგილზე საერთოდ არ იმყოფებოდა" - ადვოკატი

"ექიმი, რომელიც ამტკიცებდა, რომ მეგი ბაქრაძეს "ადრენალინი" გაუკეთა, აღიარებს, რომ იცრუა და ადგილზე საერთოდ არ იმყოფებოდა" - ადვოკატი

მეგი ბაქრაძის გარდაცვალების საქმეზე ბრალდებული სამი პირიდან ერთ-ერთი ექიმი ვიოლეტა ინასარიძეა, რომელიც ამტკიცებდა, რომ მეგის "ადრენალინის" შემცველი ნემსი მაშინვე გაუკეთა, როგორც კი ბენეფიციარის მდგომარეობა გართულდა.

გამოძიება ინასარიძეს ცრუ ჩვენების მიცემაში სდებს ბრალს. პროკურატურის ინფორმაციით, ექიმს მეგი ბაქრაძისთვის არანაირი სამედიცინო დახმარება არ გაუწევია. მეტიც, იგი საერთოდ არ იმყოფებოდა შემთხვევის ადგილზე.

გარდაცვლილი მედდის ოჯახის ადვოკატი ვახტანგ ბარამაშვილი ამბობს, რომ მოწმეებმა ჩვენებები სამჯერ შეცვალეს. მისი ინფორმაციით, ბოლოს მიცემულ ჩვენებაში თავად ვიოლეტა ინასარიძე აღიარებს, რომ იცრუა და სინამდვილეში კლინიკაში იმ დროს საერთოდ არ იმყოფებოდა.

"ჩვენებების პირველ ნაკადში საქმის ყველა მოწმემ ერთნაირი ინფორმაცია მიაწოდა გამოძიებას. მაშინ ისინი ამბობდნენ, რომ ექიმმა ვიოლეტა ინასარიძემ მეგი ბაქრაძეს მყისიერი დახმარება აღმოუჩინა და გაუკეთა ადრენალინი. მეორე ნაკადში მოწმეებმა ჩვენება შეცვალეს და თქვეს, რომ ვიოლეტა შემთხვევის ადგილზე არ იმყოფებოდა... ხოლო მესამე ნაკადის ჩვენებებში დაემატა ისიც, რომ მეგისთვის ადრენალინი არ გაუკეთებიათ.

საქმეში დევს ვიოლეტა ინასარიძის აღიარება. მას არავინ აიძულებდა ეს ეღიარებინა და ეთქვა, რომ არანაირი დახმარება არ აღმოუჩენიათ მაშინვე, რადგან მოგვიანებით მაინც გაუკეთებდნენ ადრენალინს და სისხლის ანალიზში მაინც აღმოჩნდებოდა ამ მედიკამენტის შემცველობა. ვერ გეტყვით რატომ მისცა ასეთი აღიარება ექიმმა გამოძიებას. ახლა შემიძლია ის ვთქვა, ეს ბრალის წარდგენა არის გამოძიების მიერ წინგადადგმული ნაბიჯი" - ეუბნება ადვოკატი Ambebi.ge -ს.

პროკურატურამ ცრუ ჩვენების მიცემისთვის ბრალი კლინიკა „იმედის“ ორ ექიმს და ერთ ექთანს წაუყენა. ახალციხელი ექთანი, მეგი ბაქრაძე 19 მარტს, თბილისის საუნივერსიტეტო კლინიკაში გარდაიცვალა. წინასწარი მონაცემებით, მას კოვიდსაწინააღმდეგო აცრის შემდეგ, რომელიც ახალციხეში, კლინიკა „იმედში“ 18 მარტს ჩაუტარდა, სავარაუდოდ, ანაფილაქსიური შოკი განუვითარდა. მედდის გარდაცვალების საქმეზე გამოძიება სისხლის სამართლის კოდექსის 116-ე მუხლით მიმდინარეობს, რაც სიცოცხლის გაუფრთხილებლობით მოსპობას გულისხმობს. საგამოძიებო მოქმედებები მიმდინარეობს როგორც ახალციხის, ისე თბილისის საუნივერსიტეტო კლინიკაში.

უკვე ორი კვირაა გამოძება ელოდება საქმის მთავარ მტკიცებულებას, სამხარაულის ექსპერტიზის ბიუროს დაკვნას, რომელმაც უნდა დაადგინოს, რა გახდა 27 წლის ქალის გარდაცვალების მიზეზი.

"მეგი რომ ვნახე, იმხელა იყო გამხდარი, თვალი თავის ადგილზე არ ჰქონდა... 3 000 ლარი გირაო სასაცილოა" - ბაქრაძის მეუღლე სასამართლოს გადაწყვეტილებაზე

"ვიოლეტა გამოძიებასთან თვითონ მივიდა და უთხრა: "არასწორად მოვიქეციო" - რას ამბობს ბაქრაძის საქმეზე ბრალდებულის ადვოკატი?

თელავის საავადმყოფოს დირექტორის მკვლელობის ფაქტზე დაკავებული შსს-ს ყოფილი თანამშრომლის საქმეს ნაფიც მსაჯულები განიხილავენ