საქართველოს მოქალაქემ მადრიდში საიუველირო მაღაზიის ძარცვისას მძევლები აიყვანა - რას წერს "დოიჩე ველე"

საქართველოს 31 წლის მოქალაქემ კონსტანტინე ფ.-მ ესპანეთის დედაქალაქის, მადრიდის ცენტრში მდებარე ცნობილი საიუველირო მაღაზია "ერმიტაჟი” გაძარცვა, - ამის შესახებ გამოცემა "დოიჩე ველეში“ გამოქვეყნებულ სტატიაშია აღნიშნული. შემთხვევა 4 მაისს, რეგიონალური არჩევნების დღეს მოხდა.

"კორონავირუსმა ესპანეთში ქართველი ქურდების საქმიანობა ვერ შეაფერხა“, - წერს გამოცემა და აღნიშნულია, რომ მძევლების აყვანამ და ვიტრინების ჩამსხვრევამ პანიკა გამოიწვია.

"დოიჩე ველეს" ცნობით, ეს ამბავი მძარცველის დაპატიმრებით დასრულდა.

მადრიდის ადვოკატთა ასოციაციის წევრმა, ხოსე იგნასიო ფლორესმა, იურისტმა, რომელსაც არაერთხელ მოუწია საქართველოს მოქალაქეების დაცვა სასამართლოში, გამოცემას განუცხადა, რომ დაკავებულს ციხეში ხანგრძლივად ყოფნა მოუწევს, ვინაიდან ეს საქმე "ატიპიურია", რადგან ამ დრომდე ქართველი მძარცველები, როგორც წესი, ბინების ძარცვით იყვნენ დაკავებულები და ძალადობას არ მიმართავდნენ.

ესპანეთის ეროვნული პოლიციის ინფორმაციით, მხოლოდ აპრილის ბოლოს, სევილიასა და ხიხონში საქართველოს 8 მოქალაქე დააკავეს, რომლებიც 28 ბინის ძარცვაში არიან ბრალდებულები.