"თქვენი შვილები ახლა შესაძლოა სკოლაში არიან, ესენი კი "ბოევიკობაზე" ოცნებობენ" - ღაზაში გადაღებულ რა ფოტოს აქვეყნებს ისრაელში მყოფი ქართველი ჟურნალისტი

თელ-ავივში მცხოვრები ქართველი ჟურნალისტი მიხეილ ხეცოიძე ღაზას სექტორიდან ფოტოს აქვეყნებს, რომელზეც იარაღითა და სამხედრო სამოსით აღჭურვილი ბავშვია გადაღებული.

მისი ინფორმაციით, ფოტო რამდენიმე საათის წინ არის გადაღებული და ნათლად ასახავს იმ მწარე რეალობას, რომელიც ადგილზეა.

"ეს ბავშვი ცხოვრობს ღაზას სექტორში. ფოტო გადაღებულია რამდენიმე საათის წინ და ის ნათლად ასახავს მწარე რეალობას. ჩვენი და თქვენი შვილები ახლა შესაძლოა სკოლაში არიან, სწავლობენ, ან მეგობრებთან თამაშობენ....

მაგრამ ღაზას სექტორში ბავშვების უმეტესობა ამ სტილით ცხოვრობს. ისინი "ბოევიკობაზე" ოცნებობენ და ბავშვობიდან სწავლობენ ცეცხლსასროლი იარაღის გამოყენებას.

P.s. ცეცხლის შეწყვეტის შემდეგ, პალესტინელების "ზეიმის" დროს არის ეს ფოტო გადაღებული" - წერს ხეცოიძე.

ცნობისთვის, ისრაელსა და "ჰამასს“ შორის ეგვიპტის შუამავლობით მიღწეული ცეცხლის შეწყვეტის შეთანხმება გუშინ, 02:00 საათიდან შევიდა ძალაში. ცეცხლის შეწყვეტის რეჟიმის ამოქმედებისთანავე ღაზას ქუჩებში პალესტინელები გამოვიდნენ და სკანდირებდნენ: "უფალი დიდია, მადლობა უფალს!“ მეჩეთის საყვირებიდან კი ისმოდა: "იერუსალიმის ხმლის" ბრძოლის დროს ოკუპაციის (ისრაელის) წინააღმდეგ გამარჯვება მიღწეულია ".

გამარჯვებას კონფლიქტის ორივე მხარე აღნიშნავს, თუმცა ორივე აცხადებს, რომ ცეცხლის შეწყვეტის დარღვევის შემთხვევაში, მზად არის საპასუხო ნაბიჯისთვის.