ცნობილმა ქართველმა საოპერო მომღერალმა აშშ-ში კულტურის ცენტრი დააფუძნა - "ეს ადგილი ხელოვანებისთვის ბოჰემური თავშეყრის ადგილად უნდა იქცეს"

„ახლო მომავალში მასშტაბურ პროექტს ვგეგმავ ფილადელფიაში, მის უნიკალურ ზონაში, რომელსაც გარშემო დიდი სივრცე ექნება და ეს იქნება უნიკალური ცენტრი ხელოვანებისთვის, სადაც ასევე მოეწყობა ულამაზესი ბაღი და დიდი საპარკინგე ადგილი მანქანისთვის,“ - გვითხრა ცოტა ხნის წინ თავის ინტერვიუში ამერიკაში მოღვაწე ქართველმა საოპერო მომღერალმა დავით ღვინიანიძემ. ინტერვიუდან ორ თვეში კი, როგორც შევიტყვეთ, უზარმაზარი შენობაში „დავით ღვინიანიძის მუსიკისა და ხელოვნების ცენტრი“ მართლაც გაიხსნა, რომელსაც 2000-კაციანი საკონცერტო დარბაზი აქვს.

„დავით ღვინიანიძემ ადვოკატებთან და ამერიკულ მხარესთან ერთად, ხელი მოაწერა უნიკალურ დოკუმენტს, რომელიც ამერიკაში „დავით ღვინიანიძის სახელობის ხელოვნებისა და მუსიკის ცენტრის“ გახსნას ადასტურებს. აღნიშნულ სივრცეში ბევრი მუსიკოსი შეძლებს თავისი ხელოვნების დემონსტრირებას.

ცენტრი მხატვრებისთვის, მოცეკვავეებისთვის და ყველა ჟანრის ხელოვანისთვის ბოჰემური თავშეყრის ადგილადაც უნდა იქცეს. ხელოვნებისა და მუსიკის ცენტრი აღჭურვილია მულტიფუნქციური სერვისით,“ - გვეუბნება მომღერლის ნდობით აღჭურვილი პირი. მისივე თქმით, "მართლაც უპრეცედენტო ფაქტია, როცა უცხოეთში წარმატებული ქართული ხელოვანი, საოპერო მომღერალი კულტურის ცენტრს ხსნის. დავით ღვინისნიძემ ამ ნაბიჯით შეძლო, საქართველო და მისი კულტურა აშშ-სთან ასე დაეკავშირებინა".

ასევე ნახეთ: ოპერის მომღერალ დავით ღვინიანიძის გზა ქუთაისიდან ამერიკულ წარმატებამდე - "ყოველთვის მინდოდა, მშობლებისთვის დამემტკიცებინა, რომ ნამდვილი ხელოვანი ვიყავი"