დერეკ შოვინმა დუმილი დაარღვია და ჯორჯ ფლოიდის ოჯახს მიმართა - რა მოხდა პროცესზე, სადაც ყოფილ პოლიციელს 22-წლიანი პატიმრობა მიუსაჯეს

სასამართლომ ყოფილ პოლიციელ დერეკ შოვინს, რომელიც აშშ-ის ქალაქ მინეაპოლისში ფერადკანიანი მამაკაცის, ჯორჯ ფლოიდის მკვლელობაშია ბრალდებული, 22 წელზე მეტი ხნით თავისუფლების აღკვეთა მიუსაჯა.

აპრილში, 12-მა ნაფიცმა მსაჯულმა 45 წლის შოვინი სამივე ბრალდებაში - მეორე ხარისხის მკვლელობა, მესამე ხარისხის მკვლელობასა და გაუფრთხილებლობით მკვლელობა - დამნაშავედ ცნო.

ბრალდებულმა სასჯელის მოსმენის დროს დუმილი დაარღვია და სამძიმარი გამოთქვა ფლოიდის ოჯახის მიმართ.

• "იურიდიული საკითხების გამო სრულ განცხადებას ვერ გავაკეთებ, მოკლედ ვიტყვი, მინდა, მივუსამძიმრო ფლოიდების ოჯახს. მომავალში საინტერესო ინფორმაცია იქნება, რომელიც იმედი მაქვს, სიმშვიდეს გაპოვნინებთ“, - თქვა შოვინმა

ცნობისთვის, პროკურორები 30-წლიან პატიმრობას მოითხოვდნენ "წამების“ ბრალდებით.

შეგახსენებთ, გასულ წელს გავრცელებულ ვიდეოში ასახულია 46 წლის ფერადკანიანი მამაკაცის, ჯორჯ ფლოიდის პოლიციის მიერ დაკავების ვიდეო. ვიდეოში ჩანს, რომ დერეკ შოვინი ხელბორკილებდადებულ მიწაზე გაწოლილ ფლოიდს 9 წუთზე მეტი ხნის განმავლობაში მუხლს კისერზე აჭერს.

ისმის დაკავებულის ხმა: "ვეღარ ვსუნთქავ!“. ამ ინციდენტის დროს ფლოიდი შეუძლოდ გახდა და გარდაიცვალა. მის გარდაცვალებას აშშ-ში მასობრივი საპროტესტო აქციები მოჰყვა.