რუსეთში გაუჩინარებული თვითმფრინავის ნამსხვრევები იპოვეს - "ნაკლებად სავარაუდოა ავიაკატასტროფას ვინმე გადარჩენოდა"

რუსეთში გაუჩინარებული თვითმფრინავის ფრაგმენტები იპოვეს. ამის შესახებ BBC ოფიციალურ რუსულ წყაროებზე დაყრდნობით წერს. გამოცემის ცნობით, სამგზავრო თვითმფრინავის ნამსხვრევები, რომელშიც 28 ადამიანი იმყოფებოდა, რუსეთის უკიდურეს აღმოსავლეთ ნაწილში აღმოაჩინეს.

An-26-ის ტიპის თვითმფრინავი რადარებიდან დღეს გაქრა. ის პეტროპავლოვსკ-კამჩატსკიდან პალანასკენ მიემართებოდა. დაუდასტურებელი ინფორმაციით, თვითმფრინავში იმყოფებოდა პალანას ადმინისტრაციული ერთეულის ხელმძღვანელი ოლგა მოხირევა.

ფიქრობენ, რომ ნაკლებად სავარაუდოა ავიაკატასტროფას ვინმე გადარჩენოდა. დაუდასტურებელი ინფორმაციით, თვითმფრინავი ჯერ კლდეს შეეჯახა, ხოლო შემდეგ მისი ნაწილები სანაპიროზე ჩამოცვივდა.

რუსული სააგენტო Tass-ის ცნობით, ადგილობრივი ავიაკომპანიის ხელმძღვანელი ალექსეი ხრაბროვი თვითმფრინავის ფრაგმენტების პოვნის შესახებ ინფორმაციას ადასტურებს, თუმცა დამატებით დეტალებზე ჯერჯერობით ვერ საუბრობს.

ამ დრიოსთვის სამძებრო-სამაშველო სამუშაოები გრძელდება.