"ანარქიაა და ყველა იმას აკეთებს, რაც სურს... ეს საშინელებაა" - "კვარა", მამუკა ჯუღელი და განრისხებული ოსიმენი - როგორ ეხმიანება იტალიური მედია და გულშემატკივარი სკანდალს
ტრიუმფის შემდეგ, იტალიურ საფეხბურთო კლუბ "ნაპოლიში" პრობლემებია. როგორც მედიაში არაერთხელ დაიწერა, პრობლემებია გასახდელში, მწვრთნელთან და ა.შ. რაც აისახება კლუბის შედეგებზე. მიმდინარე სეზონში "ნაპოლი" სერია ა-ში ამ დროისთვის მეცხრე ადგილს იკავებს.
ამ ყველაფერს კიდევ ერთი სკანდალი დაემატა, რაც ამჯერად კლუბის ქართველი ფეხბურთელის, ხვიჩა კვარაცხელიას აგენტს, მამუკა ჯუღელს და მის მიერ კვარაცხელიას ნიგერიელი თანაგუნდელის, ვიქტორ ოსიმენის შესახებ გაკეთებულ განცხადებას უკავშირდება.
- ამბავი ასეთია - მამუკა ჯუღელმა პირველი არხისთვის მიცემულ ინტერვიუში თქვა:
"თქვენ გგონიათ, მთელი ცხოვრება ნეაპოლში ითამაშებს ოსიმენი? მაშინ მე წინასწარ გეტყვით, ზაფხულის სატრანსფერო ფანჯარაზე წავა საუდის არაბეთში. ხვიჩას მილიარდი რომ მისცე, არაბეთში არ წავა, ხვიჩა წავა "რეალში", "ბავარია", "ბარსელონა", "მანჩესტერ სიტი", ამ გუნდებს სიტყვაზე გეუბნებით.
ხვიჩას სხვა გემოვნება და სხვა ცხოვრებისეული ტვინი აქვს. ხვიჩას სურს, რომ სულ ზემოთ იყოს და ასეც იქნება", - განაცხადა ჯუღელმა.
"კვარას" აგენტის ამ განცხადებამ ოსიმენი როგორც ჩანს, ძალიან გაანაწყენა და ჯუღელს "ინსტაგრამზე" გამოქვეყნებული სთორის საშუალებით უპასუხა. პასუხი საკმაოდ მწვავეა:
"ძვირფასო მამუკა ჯუღელო, სამარცხვინო და ბინძური ხარ! მრცხვენია შენი მსჯელობის უნარის გამო. ჩემი სახელი აღარ ახსენო, იდიოტო", - წერს ოსიმენი.
- ამ დაპირისპირებას რეზონანსი მოჰყვა მედიაში, მსოფლიოს სხვადასხვა გამოცემები აქტიურად აშუქებენ ჯუღელისა და ოსიმენის დაპირისპირებას. თემა პოპულარულია X-ში, სადაც ფანები საკითხის გარშემო თავიანთ მოსაზრებას გამოთქვამენ. განსაკუთრებით კი იტალიელი ფანები აქტიურობენ. გთავაზობთ ზოგიერთი მათგანის კომენტარს:
"მშვიდი კლიმატი ნეაპოლში, ტკბილი სიტყვები ოსიმენსა და კვარაცხელიას აგენტს შორის.“
"ოსიმენის სენსაციური განცხადება კვარაცხელიას აგენტის მიმართ.“
"სიმართლე ისაა, რომ შარშან "ნაპოლიში" მუშაობდნენ ჯუნტოლი და სპალეტი, შესანიშნავი დუეტი, რომლებიც იცავდნენ გასახდელს. ახლა ანარქიაა და ყველა იმას აკეთებს რაც სურს, საშინელებაა“.
"მიუხედავად შარშანდელი წარმატებისა, ნათელია, რომ გუნდში პრობლემებია. იტალიურ კლუბს ესაჭიროება მენეჯერი, რომელიც ყველაფერს დაალაგებს", - წერენ გულშემატკივრები.
დაპირისპირების შესახებ სოციალურ ქსელში ინფორმაციას აქვეყნებს ცნობილი იტალიელი ჟურნალისტი ფაბრიციო რომანო და თავის გამომწერებს კონფლიქტის დეტალებს უზიარებს:
ოსიმენისა და ჯუღელის სიტყვებს ციტირებს ასევე პოპულარული იტალიური გამოცემა La Gazzetta dello Sport:
- ნახეთ ასევე:
- "ყველამ საკუთარ საქმეს მიხედოს... ეს პრობლემებს უქმნის ვიქტორს" - სკანდალი გრძელდება: ოსიმენის აგენტი მამუკა ჯუღელის განცხადებას პასუხობს
- "სამარცხვინო და ბინძური ხარ! მრცხვენია შენი მსჯელობის უნარის გამო. ჩემი სახელი აღარ ახსენო" - ვიქტორ ოსიმენი მამუკა ჯუღელს
- ვიქტორ ოსიმენის გზა ნაგავსაყრელიდან ვარსკვლავობამდე - წყლის გამყიდველი, მეოცნებე ბიჭუნას მძიმე ბავშვობისა და წარმატების ამბავი: "ჩემი ცხოვრება იყო ბრძოლა გადარჩენისთვის"