რას წერს BBC საქართველოში ნარკოტიკების შემოტანისთვის დაკავებული ბრიტანელი გოგონას საქმეზე? - ახალი დეტალები

13:12 / 05-09-2025

დიდი ბრიტანეთის მოქალაქე, ბელა მეი კალი თბილისის საერთაშორისო აეროპორტში, მიმდინარე წლის მაისში დააკავეს. მას ბარგში დიდი რაოდენობის - 12 კილოგრამამდე "მარიხუანა“ და 2 კილოგრამი "ჰაშიში“ აღმოუჩინეს. დაკავებისას ბელა ჯერ კიდევ 18 წლის იყო, მას 19 წელი მეხუთე პენიტენციურ დაწესებულებაში შეუსრულდა

დაკავებული თინეიჯერის შესახებ BBC სტატიას აქვეყნებს, სადაც ნათქვამია, რომ ბელას ადვოკატი საქართველოში ბრიტანეთის საელჩოს უმოქმედობაში ადანაშაულებს.

გამოცემის ცნობით, ადვოკატი მალხაზ სალაყაია უკმაყოფილოა ბრიტანული მხარის უმოქმედობით, რადგან ისინი არ უჭერენ მხარს მისი დაცვის ქვეშ მყოფს.

დიდი ბრიტანეთის საგარეო საქმეთა სამინისტროს წარმომადგენლის თქმით, ბრიტანულ მხარეს კომუნიკაცია აქვს 19 წლის გოგონას ოჯახთან, თუმცა საელჩოს წარმომადგენელი დაკავებულთან ვიზიტით ციხეში მხოლოდ ერთხელ, 16 მაისს იმყოფებოდა.

მოზარდი დაახლოებით 5 თვის ორსულია და სალაყაიას თქმით, საელჩოს მისი ჯანმრთელობის მდგომარეობა არ შეუმოწმებია.

საგარეო საქმეთა სამინისტროს სპიკერმა განაცხადა: "ჩვენ მხარს ვუჭერთ ბრიტანელ ქალს, რომელიც საქართველოშია დაკავებული და კონტაქტზე ვართ მის ოჯახთან და ადგილობრივ ხელისუფლებასთან“.

ბელა კალი რუსთავის მე-5 ციხეშია მოთავსებული. ის 10 მაისს თბილისის საერთაშორისო აეროპორტში დააკავეს. გამოძიების ინფორმაციით, თინეიჯერი შარჯადან (არაბთა გაერთიანებული საამიროები) ჩამოფრინდა.

საქართველოს პოლიციის ცნობით, ოფიცრებმა მისი ჩანთიდან ნარკოტიკული საშუალებები ამოიღეს. კერძოდ, 12 კგ მარიხუანა და 2 კგ ჰაშიში.

ივლისში გამართულ მოსმენაზე გოგონამ თქვა, რომ უდანაშაულოა და განაცხადა, რომ "წამების შედეგად აიძულეს ამის გაკეთება“.

"მე უბრალოდ მოგზაურობა მინდოდა,“ - თქვა მან. "მე კარგი ადამიანი ვარ. უნივერსიტეტის სტუდენტი ვარ. სუფთა ვარ. ნარკოტიკებს არ ვიღებ“.

წყარო