ბერი ნიკოლოზის მრევლი ითხოვს, გარდაცვლილი სვეტიცხოველში, ან სამთავროს მონასტრის ეზოში დაკრძალონ
ბერი ნიკოლოზის (ნიკოლოზ მაქარაშვილის) გარდაცვალების შემდეგ, მრევლი საპატრიარქოსგან გადაწყვეტილების მოლოდინშია. მისი მიმდევრები ითხოვენ, რომ გარდაცვლილი მცხეთაში, სვეტიცხოვლის ტაძარში, ან სამთავროს მონასტრის ეზოში დაკრძალონ.
- მათი განმარტებით, ამ ადგილებს ბერისთვის განსაკუთრებული სულიერი დატვირთვა ჰქონდა, რადგან ის წლების განმავლობაში მსახურობდა მცხეთაში და ამ ქალაქს, როგორც ქვეყნის უმთავრეს რელიგიურ ცენტრს, დიდ მნიშვნელობას ანიჭებდა. გარდა ამისა, სამთავროს მონასტერშია დაკრძალული მისი მოძღვარი, მამა გაბრიელი.
ბერი ნიკოლოზის მიმდევრები "ფორმულასთან" საუბარში აღნიშნავენ, რომ დაკრძალვის ზუსტი თარიღი ჯერ უცნობია და ყველაფერი საპატრიარქოს ნებაზეა დამოკიდებული.
"დაკრძალვა ზუსტად არ ვიცით როდის არის, მაგრამ ველოდებით. საპატრიარქოში ვთხოვეთ ასეთი რაღაც, რომ იქნებ მცხეთაში დავასაფლავოთ მამა ნიკოლოზი. იქ მსახურობდა სვეტიცხოველში ან სვეტიცხოვლის ეზოში ან სამთავროში. რა თქმა უნდა, საპატრიარქო თუ ინებებს ამას, მამა გაბრიელიც, მისი მოძღვარიც იქ არის დასაფლავებული სამთავროს მონასტერში და ძალიან დიდ მნიშვნელობას აძლევდა მამა ნიკოლოზი, როგორც რელიგიურ უდიდეს ცენტრს საქართველოში.“ - აცხადებენ ისინი.
შეგახსენებთ, რომ ნიკოლოზ მაქარაშვილი საცხოვრებელ სახლში გარდაცვლილი 19 აპრილს იპოვეს. ამ ფაქტს ხმაურიანი დაპირისპირება მოჰყვა - სახლთან შეკრებილი მრევლი შენობაში შესვლას ითხოვდა, რისი საშუალებაც პოლიციამ არ მისცა. ამას სამართალდამცავებსა და მოქალაქეებს შორის შეხლა-შემოხლა მოჰყვა. ამ წუთებში მრევლი იმ სარიტუალო სახლთან იკრიბება, სადაც ბერია დასვენებული და საპატრიარქოს საბოლოო პასუხს ელოდება.
- ნახეთ ასევე:
- "არ ლაპარაკობდა და მიწერდა - ესენი არ არიან კარგად, ეს სექტააო... ჩემთან სხვა ურთიერთობა ჰქონდა, სექტანტებთან - სხვა" - რას ჰყვება მალხაზ ჯინორია, ვინც ბერ ნიკოლოზთან ექიმის შეყვანას ცდილობდა?
- "ბერს არ უნდა ჩაუტარდეს გაკვეთა. ეს არ შეიძლება, ამის გამო მოვითხოვეთ, რომ ექსპერტიზა არ გვინდა“ - ბერი ნიკოლოზი სარიტუალო დარბაზში გადაასვენეს, სადაც მრევლი იკრიბება