პარტნიორები:
ავტორი:

"ბამბის ნაყინი" კოსმოსში - ასტრონომებმა იპოვეს გიგანტური პლანეტები, რომლებიც იუპიტერის ზომისაა, თუმცა საოცრად მსუბუქი: ისტორიული აღმოჩენის დეტალები

"ბამბის ნაყინი" კოსმოსში - ასტრონომებმა იპოვეს გიგანტური პლანეტები, რომლებიც იუპიტერის ზომისაა, თუმცა საოცრად მსუბუქი: ისტორიული აღმოჩენის დეტალები

მეცნიერებმა კოსმოსში აღმოაჩინეს პლანეტების წყვილი, რომლებიც თავისი სიმკვრივით ბამბის ნაყინს უფრო ჰგავს, ვიდრე მყარ ციურ სხეულს. "სუპერ-პუფებად" (super-puffs) წოდებული ეს გიგანტები ზომით იუპიტერს უტოლდებიან, თუმცა მათი წონა იმდენად მცირეა, რომ მეცნიერებსაც კი აოცებს.

სხეულები ჩვენგან 1110 სინათლის წლითაა დაშორებული.

ოქსფორდის უნივერსიტეტის მკვლევარმა, ჯორჯ დრანსფილდმა, ეს აღმოჩენა უჩვეულო შედარებით აღწერა. მისი თქმით, ამ ორი პლანეტის სიმკვრივე შეიძლება შედარდეს "პარსვის ქაფის მასასთან, რომელიც ახლახან გამოვიდა ფლაკონიდან".

  • მიუხედავად იმისა, რომ მათ "ბამბის ნაყინის პლანეტებს" უწოდებენ, მეცნიერები ვარაუდობენ, რომ ისინი სინამდვილეში ვარდისფერი სულაც არ არიან. მათი ფერი, სავარაუდოდ, თეთრი ან ლურჯია - იმისდა მიხედვით, თუ რამდენად ღრუბლიანია იქაური ცა.

ეს უჩვეულო ციური სხეულები NASA-ს თანამგზავრმა TESS-მა მფრინავი თევზის (Volans) თანავარსკვლავედში დააფიქსირა. კვლევის შედეგები ჟურნალში Monthly Notices of the Royal Astronomical Society გამოქვეყნდა.

აი, რა არის ცნობილი მათ შესახებ:

  1. შემადგენლობა: ვარაუდობენ, რომ პლანეტები ძირითადად წყალბადისა და ჰელიუმისგან შედგება.
  2. შედარება იუპიტერთან: ჩვენი მზის სისტემის გიგანტი, იუპიტერი, ამ პლანეტებზე 35-ჯერ უფრო მკვრივია.
  3. მანძილი: ისინი დედამიწიდან თითქმის 6 ტრილიონი მილის დაშორებით მდებარეობენ.

მომავალში NASA-ს ჯეიმს ვების ტელესკოპი (Webb Space Telescope) გამოიყენებს თავის შესაძლებლობებს, რათა ზუსტად დაადასტუროს ამ "ფუმფულა" სამყაროების ქიმიური შემადგენლობა.

მეცნიერების განმარტებით, მსგავსი "სუპერ-პუფები" კოსმოსში უკიდურესად იშვიათია. დღეისთვის დადასტურებული 6300-მდე ეგზოპლანეტიდან, ასეთი ტიპის 40-ზე ნაკლები ობიექტია ნაპოვნი.

ვარაუდობენ, რომ ისინი ახალშობილი ვარსკვლავების გარშემო არსებული გაზისა და მტვრის დისკოში ყალიბდებიან, სადაც გაზის რაოდენობა მტვერზე გაცილებით მეტია.

"ასეთი ეგზოტიკური სისტემების შესწავლით ჩვენ ვამატებთ ახალ დეტალებს პლანეტების ფორმირების დიდ პაზლში და მეტს ვიგებთ ჩვენს ადგილზე კოსმოსში", - აღნიშნავს დრანსფილდი.

წყარო

იხილეთ ასევე:

ტეგები თემაზე: