"იმაზე სამჯერ მეტი ადამიანი მონათლა გუშინ პატრიარქმა ზემო აჭარაში, ვიდრე თბილისში აქციაზე ვიხილეთ. ესეც აჩვენებს, სად დგას ქართველი ხალხი" - შალვა პაპუაშვილი
იმაზე სამჯერ მეტი ადამიანი მონათლა გუშინ პატრიარქმა ზემო აჭარაში, ვიდრე თბილისში აქციაზე ვიხილეთ - ესეც აჩვენებს, სად დგას ქართველი ხალხი, - ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა, რითაც ოპოზიციის გუშინდელ აქციას გამოეხმაურა.
მისივე თქმით, ქართველი ხალხი ვერ იდგება იმ ფსევდორელიგიურ სექტასთან, რომელიც ცდილობს, რომ საზოგადოებრივი სივრციდან საქართველოს ეკლესია გაწიოს, რომელიც ცდილობს, რომ საქართველოს ხელისუფლებაში მოვიდეს ისეთი ძალა, რომელიც უცხო ქვეყნის ხელისუფლებების პირდაპირ გავლენას დაექვემდებარება.
"გუშინ გახლდით ზემო აჭარაში, სადაც საქართველოს კათოლიკოს-პატრიარქმა აჭარის მკვიდრი მოსახლეობა მონათლა. იქ იყვნენ ბავშვებიც, ზრდასრულებიც. გუშინ, აქციაზე რაც ვიხილეთ ადამიანები, სამჯერ მეტი ადამიანი მონათლა კათოლიკოს-პატრიარქმა ზემო აჭარაში. ესეც აჩვენებს, სად დგას ქართველი ხალხი. ქართველი ხალხი ვერ იდგება იმ ფსევდორელიგიურ სექტასთან, რომელიც ცდილობს, რომ საზოგადოებრივი სივრციდან საქართველოს ეკლესია გაწიოს, რომელიც ცდილობს, რომ საქართველოს ხელისუფლებაში მოვიდეს ისეთი ძალა, რომელიც უცხო ქვეყნის ხელისუფლებების პირდაპირ გავლენას დაექვემდებარება. მოკლედ რომ ვთქვათ, ანტიპატრიოტული და აგენტურული ძალაა. ასე რომ, გუშინდელი დღე ყველაზე კარგი ილუსტრაცია - თბილისში შეკრებილი ფსევდორელიგიური სექტის რამდენიმე ასეული წარმომადგენელი, რომელიც კვლავ თავის ფსევდორელიგიურ რიტუალს ასრულებდა და ნამდვილი რწმენით შეკრებილი ადამიანები ზემო აჭარაში - სამჯერ მეტი, ვიდრე თბილისში გუშინ ვიხილეთ.
ხალხი არ დგას აგენტურის მხარეს, ხალხი ვერ დადგება იმათ მხარეს, ვინც ამბობს რომ ცალ ფეხზე უნდა დაუდგე უცხო ქვეყნის ხელისუფლებას, უნდა მოემსახურო უცხო ქვეყნის ინტერესებს, ვერ დადგება იმ სექტის მხარეს, რომელიც თავს ესხმის საქართველოს ეკლესიას, ვერ დადგება იმ სექტის მხარეს, რომელიც საქართველოს ინტერესებს ნებისმიერი სხვა ქვეყნის ინტერესებს ანაცვალებს,“ - განაცხადა პაპუაშვილმა.
- რაც შეეხება კითხვას იმასთან დაკავშირებით, რომ “მიხეილ სააკაშვილის ბანერებმა აქციის მონაწილეების ნაწილის გაღიზიანება გამოიწვია”, საქართველოს პარლამენტის თავმჯდომარე აღნიშნავს, რომ ცდილობენ წარმოაჩინონ ვითომ, რაღაც უთანხმოება არსებობს, თუმცა ეს ყველაფერი თამაშია, რომელსაც 14 წელია ვაკვირდებით.
"ეს იყო "კოლექტიური ნაცმოძრაობის“ აქცია. ნურავინ მოიტყუებს თავს, თითქოს, შიგნით დაპირისპირება აქვთ, ალიანსში არიან სხვადასხვანაირად. სააკაშვილს ვითომ თავს ესხმიან, ადამიანები რომლებიც მისი ხელისუფლების და მისი დანაშაულებრივი საქმიანობის მთავარი იდეოლოგები და განმახორციელებლები იყვნენ - ბოკერია, გვარამია და სხვები. ეს უბრალოდ, თამაშია, რასაც ვუყურებთ. ამ თამაშს 14 წელია ვაკვირდებით - ვითომ იშლებიან, შემდეგ ისევ იკრიბებიან. ერთმანეთს ლანძღავენ, შემდეგ თავის პარტიაში ეპატიჟებიან ხელმძღვანელ თანამდებობებზე. მერამდენედ უნდა შევხედოთ ამ ყველაფერს, როდესაც ცდილობენ წარმოაჩინონ ვითომ, არსებობს რაღაც უთანხმოება. ეს არის "კოლექტიური ნაცმოძრაობა“ და სწორედ "კოლექტიური ნაცმოძრაობის“ გასამართლების პროცესს ვაკვირდებით ჩვენ ეს დღეები,“ - აღნიშნა მან.
ცნობისთვის, გუშინ, “ოპოზიციის ალიანსის” მიერ ორგანიზებული აქცია, სახელწოდებით - "საქართველო ივანიშვილის გარეშე” გაიმართა. ოპოზიციონერი პოლიტიკოსები და მოქალაქეები ჯერ თბილისის ივანე ჯავახიშვილის სახელმწიფო უნივერსიტეტის პირველ კორპუსთან შეიკრიბნენ, შემდეგ კი მსვლელობით რუსთაველის მეტროსთან გადაინაცვლეს, სადაც რამდენიმე პოლიტიკოსმა საზოგადოებას მიმართა. პოლიტიკოსების თქმით, ეს აქცია იქნება სხვა პერმანენტული აქციების დასაწყისი, 28 ნოემბერს კი თბილისში მასშტაბური აქციის გამართვა იგეგმება.
ასევე იხილეთ:
- "დღეიდან კიდევ სხვანაირი სიყვარული და მიჯაჭვულობა მექნება აჭარასთან..."- საყოველთაო ნათლობა მაღალმთიან აჭარაში - პატრიარქმა 1200-ზე მეტი ადამიანი მონათლა
- "საქართველო ივანიშვილის გარეშე“ - რა ვითარებაა თსუ-ს პირველ კორპუსთან, სადაც ოპოზიციური პარტიები და სამოქალაქო საზოგადოება საპროტესტო აქციას მართავენ