ალ კაპონეს ავტომობილი აუქციონზე იყიდება

აშშ-ის კრიმინალური სამყაროს შეფის, ალ კაპონეს საყვარელი ავტომობილი - Cadillac V-8 Town Sedan გასაყიდად გამოაქვთ.

მაშინ, როდესაც ცნობილი განგსტერი ამ მანქანით დადიოდა, აშშ-ში ყველა კამათი ავტომატების დახმარებით წყდებოდა, თუმცა მანქანას ეს არ ეტყობა.

ალ კაპონემ ის სპეციალურად შეუკვეთა და მოითხოვა, რომ ტყვიაგაუმტარ შუშებში 2.5 სმ-ის სისქის დირე დაეტოვებინათ, რათა საჭიროების შემთხვევაში, იარაღის სროლა მანქანიდანვე შეძლებოდა.

ალ კაპონემ "კადილაკი" არა მხოლოდ 4 საბურავიან "ტანკად" აქცია, არამედ მისი მწვანედ შეღებვა მოითხოვა. ეს შეფერილობა კრიმინალური სამყაროს თავკაცს შემთხვევით არ აურჩევია - იმ დროს პოლიციის მანქანებიც მწვანე იყო. კაპონემ მანქანას ციმციმები და პოლიციის რადიოც დაუმონტაჟა.

ლოტის ფასი ნახევარი მლნ დოლარია, თუმცა მისი ისტორიული მნიშვნელობის გამო, ავტომობილი გაცილებით ძვირად გაიყიდება.

საქმე ის არის, რომ ეს "კადილაკი" ალ კაპონეს გარდა, მეორე მსოფლიო ომის დროს პრეზიდენტ რუზველტს იცავდა. იმ დროს თეთრი სახლის ბინადარს კონგრესის ნებართვის გარეშე უფლება არ ჰქონდა, 750 დოლარზე მეტი ღირებულების ტრანსპორტი შეეძინა, ხოლო ეს დაჯავშნული მანქანა გაცილებით ძვირად ფასობდა. ასე რომ, დაპატიმრებული ალ კაპონეს ლიმუზინი რუზველტს ძალიან გამოადგა.

მომზადებულია The Sun-ის მიხედვით.