ცენტრალურმა საარჩევნო კომისიამ (ცესკო), როგორც მოსალოდნელი იყო, უარი განუცხადა ბლოკ "ბიძინა ივანიშვილი - ქართულ ოცნებას" საარჩევნო ნომრად 7-იანის გამოყენებაზე და მას 41-ე ნომერი მიანიჭა.
1-ლი ოქტომბრის საპარლამენტო არჩევნებში გამარჯვების მოსაპოვებლად ორი პოლიტიკური ძალა იბრძოლებს - "ერთიანი ნაციონალური მოძრაობა", რომლის საარჩევნო ნომერი არის 5 და "ბიძინა ივანიშვილი-ქართული ოცნება", რომლის საარჩევნო ნომერი იქნება 41. დღეს შევეცდებით გავაანალიზოთ 5-ისა და 41-ის ნუმეროლოგიური კოდი.
ნუმეროლოგიაში ციფრ 5-ს პლანეტა მერკური მართავს, რომლის დადებითი გავლენა ადამიანებზე ასეთია: იოლი ურთიერთობა, სწრაფი მოძრაობა, ცნობისმოყვარეობა, სიმსუბუქე, ორატორული ნიჭი, გონიერება, ინფორმაციის სწრაფად და დროულად მიღება-დამუშავება-გადაცემა, ბევრი საქმის ერთდროულად კეთება, მოლაპარაკებებისა და კომერციული გარიგებების ნიჭი.
პლანეტა მერკურის ნეგატიური გავლენა კი არის: ცბიერება, ანგარება, ორატორული ნიჭის ბოროტად გამოყენება, ზედაპირულობა, ბევრი საქმის ერთდროულად დაწყება და ბოლომდე ვერც ერთის დასრულება. უპასუხისმგებლობა, გაორება, უკომპრომისობა, სხვისი რეპუტაციის ბოროტად გამოყენება, ქურდობა.
რაც შეეხება საარჩევნო ნომერს - 41. ამ რიცხვის ნუმეროლოგიური ჯამი არის 5 (41=4+1=5) და "ერთიან ნაციონალურ მოძრაობაში" ვინმეს ნუმეროლოგიის ელემენტარული მოთხოვნები რომ სცოდნოდა, ალბათ, ყველაფერს იღონებდა, რომ "ქართულ ოცნებას" საარჩევნო ნომრად ეს რიცხვი არ აეღო. 41 არის იგივე 5 და უფრო ძლიერია, რადგან აერთიანებს ორ ციფრს - "4"-სა და "1"-ს.
4-იანის მმართველი, ნუმეროლოგიის მიხედვით, არის პლანეტა ურანი, რომელიც დადებითად მოქმედებს ადამიანის ისეთ უნარებზე, როგორიც არის: ორიგინალურობა; შემოქმედებითობა; მეგობრობა, ხალხის სურვილის წინ წამოწევა, ჰარმონიის შექმნა.
1-იანის მმართველი კი არის მზე - ანუ, ეს არის ძალა, დისციპლინა, სიკეთე, სითბო, სინათლე, აქტიურობა, ენერგიულობა, მთლიანობა, ღირსება, თავისუფლება და დამოუკიდებლობა, გულუხვობა, ლიდერობა.
ზემოთქმულიდან გამომდინარე, 41-ის ნუმეროლოგიური ჯამი უფრო ძლიერი და მრავალპლანიანია, ვიდრე 5-იანი, რადგან 41-ში არის 4-იანიც და 1-იანიც, მათი ჯამი კი უდრის 5-ს, ხოლო ცალკე 5-იანი არის მხოლოდ და მხოლოდ 5-იანი.
"ქართული ოცნებისთვის" 7-იანის (ეს საარჩევნო ნომერი თვითონ "ქართულ ოცნებას" სურდა) 41-ით შეცვლა სასიკეთოა, რადგან 7-იანი არ მიეკუთვნება "მებრძოლ" ციფრთა კატეგორიას. 7-იანი სულიერებასთან არის დაკავშირებული და მის ენერგიას ფიზიკურ სამყაროში უფრო ნაკლები გავლენა აქვს, ვიდრე 5-იანისა და 41-ისას.
საინტერესოა, რომ საპარლამენტო არჩევნებში კიდევ ერთი 5-იანი მონაწილეობს - ეს არის "ჯონდი ბაღათურია-ქართული დასი", რომლის საარჩევნო ნომერია 23. ეს რიცხვიც "მებრძოლ ციფრთა" კატეგორიას მიეკუთვნება, სადაც "ნაციონალური მოძრაობისა" და "ქართული ოცნების" საარჩევნო ნომრებიც შედიან. "მებრძოლი" ნომერი აქვთ ლეიბორისტებსაც - 38, თუმცა ოქტომბრის არჩევნებში ლეიბორისტებს ძალიან გაუჭირდებათ საკანონმდებლო ორგანოში მოხვედრა. რაც შეეხება "გიორგი თარგამაძე - ქრისტიან-დემოკრატიულ მოძრაობას", რომლის საარჩევნო ნომერია 10, თუ 10-ს ერთნიშნა ციფრამდე დავიყვანთ, მივიღებთ 1-ს (10=1+0=1). 1-იანის მმართველი კი, როგორც ზემოთ აღვნიშნეთ, არის მზე. აქედან გამომდინარე, ქდმ-მ იოლად უნდა შეძლოს საკუთარი პოზიციების ხალხამდე მიტანა და აქვს შანსი პარლამენტში მოხვდეს.
P.S. 30 აგვისტოს მთვარის აღმავალი კვანძი (რომელსაც ინდურ ასტროლოგიაში რაჰუს უწოდებენ) მორიელის ზოდიაქოში გადაინაცვლებს. შესაბამისად, მთვარის დაღმავალი კვანძი (კეტუ), რომელიც მთვარის აღმავალი კვანძის საპირისპიროდ განლაგდება ხოლმე, კუროს ზოდიაქოში გადავა. ასე იქნება განლაგებული მთვარის კვანძები 2014 წლის 18 თებერვლამდე.
რაჰუს განლაგება მორიელის ზოდიაქოში, ხოლო კეტუს - კუროს ზოდიაქოში, საკმაოდ რთულ პროცესებს, დამანგრეველ ტენდენციებს უდებს ხოლმე სათავეს. მაგალითად, ასე იყო 1994-95 წლებში, როდესაც დაიწყო ჩეჩნეთის პირველი ომი, ბრძოლა ბოსნიელებსა და ხორვატებს შორის, ომი რუანდაში და გენოციდი, აგრეთვე, იემენის სამოქალაქო ომი და ა. შ.
გარდა ამისა, ეს პერიოდი (30.08.2012 - 18.02.2014) არის ბოლო სამოცწლიანი ციკლის დამასრულებელი ეტაპი, რომელიც შეაჯამებს ბევრ მოვლენას და ადამიანებს "კარმული პასუხი გაეცემათ".
განსაკუთრებული ყურადღების გამოჩენა მართებთ პოლიტიკურად არამდგრადი ქვეყნების მმართველებს, რადგან დაიწყება ცვლილებები, რომლებსაც შეიძლება მტკივნეული პროცესები მოჰყვეს.
ეს პერიოდი ძალიან მნიშვნელოვანია ტყუპისა და მშვილდოსნის ზოდიაქოს ნიშნით დაბადებულთათვის, რადგან მთვარის კვანძები ბოლო წელიწად-ნახევარია სწორედ ამ ნიშნებში მოძრაობდნენ.
უნდა აღინიშნოს, რომ მშვილდოსნის ზოდიაქოს ნიშნით არის დაბადებული მიხეილ სააკაშვილი და მას განსაკუთრებული სიფრთხილის გამოჩენა მართებს. მშვილდოსანი გადის "კარმულ კარიბჭეს", რაც ნიშნავს, რომ ამ ნიშნით დაბადებულებმა ბოლო პერიოდში დაშვებული შეცდომები უნდა გამოასწორონ, წინააღმდეგ შემთხვევაში, შესაძლოა მოვლენები მათთვის არასასურველი მიმართულებით განვითარდეს.
ასტროლოგი რამაზ გიგაური
ყოველკვირეული გაზეთი "ყველა სიახლე"
(გამოდის ოთხშაბათობით)