იდეალურად მრგვალი კვერცხი

მამაკაცმა სურსათის შეძენის შემდეგ კვერცხის ყუთში იდეალურად მრგვალი კვერცხი აღმოაჩინა და მისი აუქციონზე გაყიდვა გადაწყვიტა.

მარკ კამერონის თქმით, ასეთი კვერცხის არსებობის ალბათობა "მილიარდიდან ერთია", ხოლო ამ ექსპონატს სამუზეუმო მნიშვნელობა აქვს. იდეალურად მრგვალი კვერცხი მან ონლაინ აუქციონ eBay-ზე განათავსა.

პირველი წინადადება, რომელიც მარკმა აუქციონის მონაწილეებისგან მიიღო, 99 ცენტი იყო, რამაც ცოტათი გაუცრუა იმედი. მოგვიანებით ფასმა ორმოც ფუნტ სტერლინგს მიაღწია.

"ეს კვერცხი უამრავ ადამიანს ვაჩვენე. არცერთ მათგანს მსგავსი არაფერი უნახავს. ინტერნეტში იდეალურად მრგვალ კვერცხზე ძიება ჩავატარე. აღმოჩნდა, რომ მსოფლიოში მხოლოდ ორ ადამიანს ჰქონდა ჩემს გარდა, ასეთი კვერცხი" - განაცხადა მარკმა ჟურნალისტებთან საუბრისას.

მომზადებულია federalpost-ის მიხედვით.