ბელგიაში შოკოლადის საფოსტო მარკებს გამოუშვებენ

ბელგიის ფოსტა მარკებს გამოუშვებს, რომელთაც შოკოლადის სუნი და გემო ექნებათ.

მარტის ბოლოს ასეთი მარკების ხუთი სახეობა გამოვა. ქაღალდი ადამიანის სხეულის სითბოზე რეაგირებს: სუნი და გემო ადამიანის, ან მისი სუნთქვის შეხებისას ჩნდება. "შოკოლადის" თითოეული მარკა დაახლოებით ექვსი ევრო ეღირება.

ფოსტის ოფიციალურ განცხადებაში აღნიშნულია, რომ შავი შოკოლადის სიმულაცია რთული ამოცანა აღმოჩნდა, ამიტომ მის შექმნაში არა მხოლოდ ბელგიელი, არამედ გერმანელი, შვეიცარიელი და ჰოლანდიელი სპეციალისტები ჩაერთვნენ.

ახალი მარკების სერიის გამოშვებით ფოსტა ცდილობს, ბელგიის ეროვნულ იმიჯში შოკოლადის მნიშვნელოვანი როლი აღნიშნოს. შოკოლადს ამ ქვეყანაში XIX საუკუნიდან ამზადებენ, როდესაც ბელგიის კოლონია კონგო მწარმოებლებისთვის კაკაოს მსხვილი მიმწოდებელი გახდა. ბელგიურ შოკოლადს მსოფლიოში აფასებენ, იგი ტრადიციული ფრანგული - ცხარე და შვეიცარული რძიანი შოკოლადისგან მნიშვნელოვნად განსხვავდება.

მომზადებულია Australian Associated Press-ის მიხედვით.