მოსკოვში საცობებისგან თავის დასაღწევად სასწრაფო დახმარების მანქანებს ქირაობენ

მოსკოველებმა საცობებთან გასამკლავებლად მარტივი გზა გამონახეს, - ისინი სასწრაფო დახმარების მანქანებს ქირაობენ და საცობში უპრობლემოდ მოძრაობენ.

ინფორმაციამ მას შემდეგ გაჟონა, რაც ერთ-ერთი შემოწმების დროს პოლიციას სასწრაფო დახმარების მანქანაში პაციენტისა და მედიკამენტების ნაცვლად კომფორტული სავარძლები და შარვალ-კოსტუმში გამოწყობილი ბიზნესმენები დახვდნენ.

იმისთვის, რომ სხვა ავტომობილების მძღოლებმა გზა დაუთმონ და საცობში თავისუფლად გადაადგილდნენ, ბიზნესმენების მიერ დაქირავებული სასწრაფო დახმარების მძღოლები სიგნალს რთავენ.

მოთხოვნის შესაბამისად, სხვადასხვა კომპანიები სარეკლამო კამპანიებშიც კი ჩაერთვნენ: "სასწრაფო დახმარება - ტაქსის" დაქირავება საათში 120 გირვანქა სტერლინგად შეგეძლებათ.

"პოლიციამ შემოწმების დროს სასწრაფო დახმარების კარი გააღო და გაოცდა. ტრადიციული კაბინის ნაცვლად უმაღლესი კლასის კომფორტული სავარძლები და ვიპ-მგზავრები დახვდნენ. რასაკვირველია, მანქანაში პაციენტები არ იმყოფებოდნენ", - წერს Daily Mail რუსულ გაზეთზე დაყრდნობით.

მომზადებულია Daily Mail-ის მიხედვით.