ქუთაისში ახალი ნაგავსაყრელისთვის დანაღმული ტერიტორია მზადდება
ქუთაისში, ნიკეას დასახლებაში არსებული ნაგავსაყრელის გაუქმება და ახალ ადგილზე მოწყობა იგეგმება. მოსახლეობა ახალი ნაგავსაყრელის შესაძლო ტერიტორიად ორ ადგილს ასახელებს. ერთი ქალაქის ძველი შემოვლითი გზის მახლობლად მდებარე ყოფილი სამხედრო დასახლება, ხოლო მეორე ე.წ. "დაჩებია".
თუმცა ნაგავსაყრელის ამ ადგილებში გადატანას, მიმდებარე სოფლების მოსახლეობა ეწინააღმდეგება. ამასთან, როგორც ირკვევა ყოფილი სამხედრო დასახლება დანაღმულია და იქ ერთი ადამიანი უკვე დაიღუპა. სწორედ ამ ტერიტორიას ასახელებენ ნაგავსაყრელის მოწყობის ახალ ადგილად ქუთაისის ადგილობრივ თვითმმართველობაშიც. ვიცე-მერის ამირან ძოწენიძის თქმით, ქალაქს ახალი ნაგავსაყრელი ექნება. თუმცა, ძოწენიძე აქვე განმარტავს, რომ მიმდინარე წლის პირველი აპრილიდან ნაგავსაყრელების მართვა თვითმმართველობას ჩამოერთვა, ცენტრალურ ხელისუფლებას გადაეცა და ამ საკითხებში ისინი ვეღარ ჩაერევიან.
სოფელ ჭოგნარში მცხოვრებლების განცხადებით კი, თუ ნიკეაზე არსებული ნაგავსაყრელი დასახლების გარდა, ქალაქის მახლობლად მდებარე სოფლებს წამლავს, ნაგავსაყრელის მდებარეობის შეცვლის შემდეგ საერთო სიტუაცია არ შეიცვლება. მათი თქმით, ტერიტორიაზე ქარი ყოველ დღე ქრის, ამიტომ ქალაქიდან ჩამოტანილი ნაგავი ისევ უკან დაბრუნდება.
"ახალი გაზეთი"
იმერეთის გუბერნატორის ხელფასი გაორმაგდა
ორი ობლისა და ორი ბებიას შემზარავი გასაჭირი გურიაში
