მეცნიერებმა მსოფლიოში ყველაზე პატარა ფილმი შექმნეს

ტრანსნაციონალური კორპორაცია IBM-ის თანამშრომლები გინესის წიგნში მოხვდნენ. მათ კინემატოგრაფიის ისტორიაში ყველაზე მოკლე ფილმი "ბიჭუნა და მისი ატომი" შექმნეს. ჩანაფიქრის განსახორციელებლად მეცნიერებმა ატომები სპეციალური მიკროსკოპით 100 მილიონჯერ გაადიდეს.

"ფილმი ერთ წუთზე ცოტა დიდხანს გრძელდება, სიუჟეტი პატარა ბიჭუნას თამაშზეა აგებული. ჩვენ გვინდოდა მხიარული, მოცეკვავე ბავშვი გვეჩვენებინა, რომელიც ბურთს ისვრის და ბატუტზე ხტუნაობს",- აცხადებენ ორგანიზაციის წარმომადგენლები.

მუშაობისას მკვლევარებმა ფილმის სიუჟეტი ძველ ვიდეოთამაშებს შეადარეს.

"ვიდეოზე გარკვევით ჩანს ატომები, რომლებიც მოძრაობაშია, ფილმის შექმნისას ერთ პრობლემას წავაწყდით: ატომები ქაოტურად მოძრაობენ და ეს ხელს გვიშლიდა ნამდვილი ისტორიის მოყოლაში",- აცხადებს მთავარი სამეცნიერო თანამშრომელი ანდრეას ჰეინრიჩი.

კორპორაცია IBM-ის წარმომადგენელმა განაცხადა, რომ მათ კალიფორნიის შტატში, სან-ხოსეს ლაბორატორიაში ფილმზე ბევრი დრო დახარჯეს, მაგრამ ეს ამად ღირდა.

"გვიხარია, რომ ძალისხმევა ჩვენმა კოლეგებმა დააფასეს და გინესის რეკორდების წიგნში მოვხვდით, ჩვენ ისტორიული მოვლენის მონაწილენი გავხდით",- აცხადებს ჰეინრიჩი.

მსოფლიოში ყველაზე პატარა ფილმი საიტ YouTube-ზე განთავსდა და ათიათასობით ადამიანის ყურადღება მიიპყრო.

მომზადებულია blogs.scientificamerican.com-ის მხიედვით.

იხილეთ ვიდეო