სტიქიამ გურჯაანის რაიონში ვენახები და სასოფლო-სამეურნეო სავარგულები 100 პროცენტით გაანადგურა

ძლიერმა წვიმამ და სეტყვამ ვენახები და სასოფლო-სამეურნეო სავარგულები გურჯაანის რაიონის ოთხ სოფელში სრულად გაანადგურა. როგორც "ინტერპრესნიუსის" კორესპონდენტი სტიქიის ზონიდან იტყობინება, სეტყვამ და ძლიერმა წვიმამ ვეჯინს, კოლაგს, ბაკურციხესა და კარდენახს მნიშვნელოვანი ზარალი მიაყენა.

ადგილზე იმყოფებიან კახეთის გუბერნატორის მოადგილე გიორგი ბოტკოველი და გურჯაანის მუნიციპალიტეტის ხელმძღვანელი ჯონი ოსიაშვილი. ოსიაშვილის განცხადებით, ვეჯინში, კოლაგში, ბაკურციხესა და კარდენახში ვენახები და სასოფლო-სამეურნეო სავარგულები 100 პროცენტით განადგურდა.

გუბერნატორის მოადგილე რამდენიმე დაზარალებულ ოჯახში მივიდა და ვითარებას ადგილზე გაეცნო. "სტიქიის მასშტაბები არ ჩამოუვარდება 2012 წლის 19 ივლისის სტიქიას. ცენტრალური ხელისუფლების გარეშე წარმოუდგენილია დაზარალებული მოსახლეობის დახმარება", - აღნიშნა გიორგი ბოტკოველმა.

წვიმისგან გამოწვეულმა ნიაღვარმა სოფლებში ათეულობით სახლის პირველი სართული და სარდაფები დატბორა, სადაც ამჟამად სამაშველო სამუშაოები მიმდინარეობს და წყალს ტუმბავენ. სოფლებს ელექტორენერგია არ მიეწოდება. ამ დროისთვის თბილისი-ბაკურციხე-თელავის მთავარ მაგისტრალზე საავტომობილო მოძრაობა აღდგენილია.

"ინტერპრესნიუსი"