ქართულ ციტრუსს რუსი ექსპერტები შეამოწმებენ

აჭარაში ციტრუსის რუსეთში ექსპორტისთვის ემზადებიან. "კავკაზსკი უზელის" ცნობით, ციტრუსის ექსპორტი შემოდგომაზე დაიწყება. ამასთან, გამოცემის ცნობით, პროდუქციის შემოწმების მიზნით, აჭარაში 10 აგვისტომდე რუსი ექსპერტების ვიზიტი იგეგმება.

"ვიმედოვნებთ, რომ შემოდგომისთვის, ციტრუსების მოკრეფის პერიოდის დაწყებამდე, რუსეთის ბაზარი ქართული მანდარინის, ლიმონისა და ფორთოხლისთვის გაიხსნება", – განუცხადა გამოცემას აჭარის სოფლის მეურნეობის მინისტრმა, ზაურ ფუტკარაძემ.

"კავკაზსკი უზელის" ცნობით, ამ დროისთვის რუსეთში ქართული ციტრუსის ექსპორტის სამი შესაძლო გზა განიხილება: ჩრდილოეთ ოსეთის გავლით, ზღვით – ბათუმიდან ნოვოროსიისკში და რკინიგზით აზერბაიჯანის გავლით.

ფუტკარაძის თქმით, ერთადერთი პრობლემა, რომელიც შეიძლება წარმოიქმნას, სავიზო რეჟიმთან არის დაკავშირებული. ის იმედოვნებს, რომ ეს საკითხიც მალე მოგვარდება.

"ინტერპრესნიუსი"