ბიუჯეტის პროექტში შემოსულობებსა და გადასახდელებს შორის უარყოფითი ნაშთი 347 მილიონ ლარს აჭარბებს

2014 წლის სახელმწიფო ბიუჯეტის პროექტში შემოსავლები 2013 წლის გეგმასთან შედარებით 42 მილიონ 700 ათასი ლარით ნაკლებია და 7 მილიარდ 379 მილიონ 800 ათას ლარს შეადგენს.

როგორც 2014 წლის ბიუჯეტის პროექტშია აღნიშნული, ძირითადი წილი შემოსავლებში გადასახადებს უკავია, რომელიც 6 მილიარდ 950 მილიონ ლარს შეადგენს, რაც წინა წლის მაჩვენებელს 30 მილიონი ლარით აღემატება. სამაგიეროდ, 72 მილიონ 700 ათასი ლარით შემცირებულია გრანტების ნაწილში.

რაც შეეხება ხარჯებს, მათი მოცულობა 2013 წლის ბიუჯეტის გეგმასთან შედარებით 233 მილიონ 830 ათასი ლარით გაზრდილია. ყველაზე დიდი წილი სოციალურ უზრუნველყოფას უკავია - 2013 წელთან შედარებით 356 მილიონ 995 ათასი ლარით მეტია და 2 მილიარდ 636 მილიონ 461 ათასს ლარს აღწევს. 74 მილიონ 796 ათასი ლარით იზრდება ხელფასებიც და მილიარდ 255 მილიონ 730 ათას ლარს აღწევს.

წარმოდგენილი პროექტის მიხედვით, 2014 წელს მისაღები შემოსულობების მთლიანი მაჩვენებელი განსაზღვრულია 8 მილიარდ 661 მილიონ 800 ათასი ლარით, გადასახდელების კი – 9 მილიარდ 9 მილიონი ლარით, სალდო უარყოფითია და 347,2 მილიონ ლარს აღწევს, რის დაფარვასაც სახელმწიფო ხაზინის ერთიან ანგარიშზე განთავსებული ნაშთის გამოყენებით გეგმავენ.

"2013 წლიდან შემოღებული იქნა დაუბეგრავი მინიმუმი დაქირავებული ფიზიკური პირის საშემოსავლო გადასახადზე, შესაბამისად, აღნიშნული ცვლილება იწვევს 2014 წლის ბიუჯეტში საშემოსავლო გადასახადიდან მისაღები შემოსავლის 180-200 მილიონი ლარით შემცირებას" – აღნიშნულია ბიუჯეტის პროექტის განმარტებით ბარათში.

აქვე განმარტავენ, რომ ბიუჯეტში გათვალისწინებულია თამბაქოს აქციზის 60 თეთრიდან 75 თეთრამდე ზრდის ეფექტი, რის შედეგადაც მოსალოდნელია თამბაქოს აქციზიდან 50 მილიონი ლარით მეტი შემოსავლის მიღება.

"ინტერპრესნიუსი"