მოხნული 9 300 ჰექტარი და დაგვიანებული ბარათები

გურჯაანის მუნიციპალიტეტში სასოფლო-სამეურნეო ბარათების დარიგება 5 თებერვლიდან დაიწყო. თუმცა როგორც ადგილობრივ თვითმმართველობაში აცხადებენ, ნაკვეთების დაახლოებით 48 პროცენტი უკვე დამუშავებულია. ამ პროექტის დაგვიანების გამო, გლეხების ნაწილი წელსაც უკმაყოფილებას გამოთქვამს.

"გურჯაანის მუნიციპალიტეტში სახნავი ფართი 19 300 ჰექტარია, ამჟამად დაახლოებით 9300 ჰექტარი მიწის ნაკვეთია დამუშავებული. ხვნის პროცესი დაგვიანებული ნამდვილად არ არის. ვინც მიწას პატრონობს, შემოდგომითაც დაამუშავა. გლეხმა კარგად იცის, რომ საშემოდგომო და საგაზაფხულო ხვნა სხვადასხვა რამეა. ეს პროგრამა მხოლოდ საგაზაფხულო სამუშაოებისთვისაა განკუთვნილი", - აცხადებს გურჯაანის გამგებელი გიორგი ჩეკურიშვილი.

გარდა ბარათების დაგვიანებისა, უკმაყოფილებას გამოთქვამს მოსახლეობის ის ნაწილიც, რომლის ნაკვეთის ფართობიც 1,25 ჰა-ს აღემატება. "რა ქნას იმ ხალხმა, ვისაც დიდი ადგილი აქვს. მე მაგალითად, ორი ჰექტარი მაქვს, მაგრამ ეს იმას არ ნიშნავს, რომ მდიდარი ვარ და დახმარება არ მჭირდება. უსახსრობის გამო ვერ ვამუშავებ. ჩემს მდგომარეობაში კიდევ რამდენი ადამიანი აღმოჩნდება?" - ამბობს ახაშენში მცხოვრები ალიკა ვარდოსანიძე.

იხილეთ ვრცლად

”სპექტრი”