რუსეთის საგანგებო სამსახურის ავტოკოლონა უკრაინისკენ გაემართა

რუსეთის საგანგებო სამსახურის ავტოკოლონა დონბასის მოსახლეობისთვის ჰუმანიტარული დახმარების მიწოდების მიზნით, უკრაინაში გაემართა.

უკრაინული მედიის ცნობით, კოლონის შემადგენლობაში 280 სატვირთო ავტომანქანაა, რომელთაც უკრაინაში 2 ათასი ტონა ჰუმანიტარული ტვირთი, მათ შორის სხვადასხვა სახის საკვები პროდუქტი, მედიკამენტები და სასმელი წყალი ჩააქვთ.

liga.net-ის ინფორმაციით, უკრაინის პრეზიდენტი პეტრო პოროშენკო ლუგანსკის ოლქში ჰუმანიტარული დახმარების საერთაშორისო მისიის გაგზავნის ინიციატივით გამოვიდა. უკრაინული მხარის გარდა, მისიაში ჩართულები იქნებიან აშშ, ევროკავშირი და რუსეთი. ინიციატივას მხარი დაუჭირა აშშ-ის პრეზიდენტმა ბარაკ ობამამ. ამასთან, აშშ-ის პრეზიდენტმა იტალიის პრემიერ-მინისტრ მატეო რენცისთან სატელეფონო საუბრისას აღნიშნა, რომ უკრაინაში რუსეთის მიერ ჰუმანიტარული დახმარება მხოლოდ კიევის თანხმობით უნდა შევიდეს.