თემურ გიორგაძემ თანამდებობა დატოვა

თბილისის საკრებულომ თემურ გიორგაძის თანამდებობიდან გათავისუფლების შესახებ განაცხადი დააკმაყოფილა.

თემურ გიორგაძის თანამდებობიდან გათავისუფლებაზე თანხმობის მიცემის საკითხს დღეს თბილისის საკრებულოს დეპუტატებმა უყარეს კენჭი. თემურ გიორგაძე საგანგებო და გადაუდებელი სიტუაციების მართვის სააგენტოს უფროსის თანამდებობიდან გათავისუფლდა. საკითხს მხარი 37-მა დეპუტატმა დაუჭირა, 6 კი – წინააღმდეგი იყო.

როგორც "ინტერპრესნიუსთან" საუბრისას თბილისის მერის იურიდიული სამსახურის უფროსმა გურანდა რომანაძემ განაცხადა, სააგენტოს ახალი უფროსის კანდიდატურას მერია საკრებულოს მომავალ კვირაში წარუდგენს.

თემურ გიორგაძე თბილისის საგანგებო სიტუაციათა საქალაქო სამსახურის უფროსის თანამდებობაზე 2002 წელს დაინიშნა. აღნიშნული საქალაქო სამსახურის ბაზაზე შემდეგ საგანგებო და გადაუდებელი მართვის სააგენტო ჩამოყალიბდა.