ევროკავშირი მზადაა, უკრაინას მეტი ფინანსური დახმარება გაუწიოს და რუსეთს დამატებითი სანქციები დაუწესოს, თუკი ამის საჭიროება იქნება. "ლიგა.ნეტ"-ის ინფორმაციით, ამის შესახებ საუბარია ევროკავშირის ელჩების სამიტის დადგენილების პროექტში. გარდა ამისა, 15 დეკემბერს ევროკავშირი გეგმავს რუსეთის მიერ ანექსირებული ყირიმისთვის დამატებითი შეზღუდვებიც დააწესოს. დოკუმენტის პროექტის თანახმად, ევროკავშირი მიესალმება უკრაინის ახალ მთავრობას, მის მზადყოფნას გაატაროს პოლიტიკური და ეკონომიკური რეფორმები. როგორც ცნობილია, 9 დეკემბერს, გერმანიის კანცლერმა ანგელა მერკელმა განაცხადა, რომ არ აპირებს მოსკოვის მიმართ თავისი პოლიტიკის შესუსტებას და ახალი სანქციებითაც დაიმუქრა.