ვიქტორ იანუკოვიჩის უმცროსი ვაჟი ტბაში დაიხრჩო

უკრაინის ექსპრეზიდენტის, ვიქტორ იანუკოვიჩის უმცროსი ვაჟი ბაიკალის ტბაში დაიხრჩო. "ცენზორ.ნეტ"-ის ცნობით, აღნიშნულ ინფორმაციას ოთხი სხვადასხვა წყარო ადასტურებს, მათ შორის ორი რუსეთში, ექსპრეზიდენტის გარემოცვიდან.

მათი ინფორმაციით, ის ბაიკალის ტბაზე სპორტულ ღონისძიებებში მონაწილეობდა, როდესაც მიკროავტობუსი ყინულში ჩავარდა. მიკროავტობუსში მასთან ერთად კიდევ ხუთი ადამიანი იმყოფებოდა. მათ გადარჩენა მოახერხეს.

ბაიკალზე მომხდარს ადასტურებს ირკუტსკის საგანგებო სიტუაციების სამმართველო, სადაც განაცხადეს, რომ გამაფრთხილებელი ნიშნის მიუხედავად, მოქალაქეები ყინულზე ფოტოს გადასაღებად გავიდნენ. მიკროავტობუსი ყინულის ნაპრალში ჩავარდა. ფაქტი 20 მარტს მოხდა. ვიქტორ იანუკოვიჩი უკრაინიდან გაქცევის შემდეგ შვილებთან ერთად რუსეთში ცხოვრობს.

"ინტერპრესნიუსი"