რუსეთის საგანგებო სიტუაციების სამინისტრო ვიქტორ იანუკოვიჩის ვაჟის დაღუპვას არ ადასტურებს

რუსეთის საგანგებო სიტუაციების სამინისტრო უკრაინის ყოფილი პრეზიდენტის, ვიქტორ იანუკოვიჩის უმცროსი შვილის, ვიქტორ იანუკოვიჩ უმცროსის დაღუპვას არ ადასტურებს. როგორც ჟურნალისტებს რუსეთის საგანგებო სიტუაციების სამინისტროს პრესსამსახურში განუცხადეს, შაბათს, ბაიკალის ტბაზე უბედური შემთხვევა მართლაც მოხდა, რა დროსაც ერთი ადამიანი დაიღუპა. კერძოდ, ბაიკალის ტბაზე, ყინულში ავტომობილი ჩავარდა, რომელშიც 6 ადამიანი იმყოფებოდა

"დაღუპულია მძღოლი, რომელიც იყო რუსეთის მოქალაქე ვიქტორ დავიდოვი. დანარჩენმა ხუთმა ავტომობილიდან გადმოსვლა შეძლო", - აცხადებენ საგანგებო სიტუაციების სამინისტროში.

დღეს რუსულმა და უკრაინულმა გამოცემებმა გაავრცელეს ინფორმაცია, რომ უკრაინის ექსპრეზიდენტის უმცროსი ვაჟი ბაიკალის ტბაში დაიხრჩო, სადაც სპორტულ ღონისძიებებში მონაწილეობდა.

"ინტერპრესნიუსი"