პერუში ავარიის შედეგად 36 ადამიანი დაიღუპა

პერუში მასშტაბური ავტოსაგზაო შემთხვევის შედეგად 36 ადამიანი დაიღუპა, 70-ზე მეტი კი დაშავდა. "ბიბისის" ცნობით, ავარია მაშინ მოხდა, როდესაც სამგზავრო ავტობუსი საპირისპირო ზოლში გადავიდა. შედეგად მას სამი მანქანა დაეჯახა - ორი ავტობუსი და ერთი სატვირთო მანქანა. ავტობუსს ქრისტიანული ორგანიზაცია - მსოფლიო მისიონერული მოძრაობის დელეგაცია გადაჰყავდა. ავარია დედაქალაქ ლიმადან 320 კილომეტრში მდებარე მაგისტრალზე მოხდა.

"წინასწარი გამოძიების მიხედვით, ავტობუსის მძღოლს სავარაუდოდ ჩაეძინა და საპირისპირო ზოლში გადავიდა, შედეგად ის მეორე ავტობუსს შეეჯახა", - განაცხადა სამაშველო სამსახურის წარმომადგენელმა, ოსკარ გონსალესმა.

მსგავსი ავტოსაგზაო შემთხვევები პერუში ხშირია. მსოფლიო ჯანდაცვის ორგანიზაციის მონაცემებით, 2010 წელს ავარიების შედეგად 2 514 ადამიანი დაიღუპა. ბოლო მასშტაბური ავარია 2013 წლის ოქტომბერში მოხდა, მაშინ ტრაგიკულ ინციდენტს 51 ადამიანი ემსხვერპლა.

"ინტერპრესნიუსი"