ბოსტონის ტერაქტში ეჭვმიტანილი ჯოხარ ცარნაევი შესაძლოა სიკვდილით დასაჯონ

ბოსტონის მარათონის დროს განხორციელებულ ტერაქტში ეჭვმიტანილი ჯოხარ ცარნაევი აშშ-ის სასამართლომ დამნაშავედ ცნო. მას 30 მუხლით ედება ბრალი. "ბიბისის" ცნობით, 21 წლის წარმოშობით ჩეჩენს შესაძლოა, სიკვდილით დასჯა მიუსაჯონ. 2013 წლის აპრილში ბოსტონის მარათონის დროს მომხდარი ტერაქტის შედეგად სამი ადამიანი დაიღუპა და 260 დაშავდა. გამოძიების ცნობით, ტერაქტი ჩეჩენმა ძმებმა ჯოხარ და ტამერლან ცარნაევებმა განახორციელეს. უფროსი ძმა ტამერლანი იმ დღესვე დაიღუპა, ჯოხარი კი გაიქცა, რომელიც მოგვიანებით დააკავეს.

როგორც ბრალდებული ჯოხარ ცარნაევი აცხადებს, მას არ სურდა ტერაქტის განხორციელება და ამისკენ მისმა უფროსმა ძმამ უბიძგა. მასაჩუსეტსის სასამართლო უახლოეს მომავალში გადაწყვეტს თუ რა სასჯელი მიუსაჯოს ბრალდებულს.

"ინტერპრესნიუსი"