ნეპალში ნანგრევებში მოყოლილი 101 წლის მოხუცი გადაარჩინეს

ნეპალში 25 აპრილს მომხდარი მიწისძვრის შედეგად ნანგრევებში მოყოლილი 101 წლის მოხუცი მამაკაცი გადაარჩინეს. "სიენენის" ცნობით, მამაკაცი დედაქალაქ კატმანდუდან ჩრდილოეთით, ნუვაკოტის რაიონში საკუთარი სახლის ნანგრევებში დაახლოებით ერთი კვირის განმავლობაში იყო მოყოლილი.

ადგილობრივი პოლიციის ინფორმაციით, მოხუცის მდგომარეობა სტაბილურია. დაახლოებით ერთი კვირის წინ მომხდარი მიწისძვრის შედეგად დაღუპულთა რიცხვმა 8 000-ს მიაღწია. დაშავდა 14 000-ზე მეტი ადამიანი.

მიწისძვრის სიმძლავრემ 7.9 მაგნიტუდა შეადგინა. სტიქიას სერიოზული ნგრევა მოჰყვა. განადგურდა ისტორიული ძეგლები, საცხოვრებელი სახლები და სხვა ინფრასტრუქტურა. ათასობით ადამიანი უსახლკაროდაა დარჩენილი. მათი დიდი ნაწილი კი საკვების, წყლისა და მედიკამენტების დეფიციტს განიცდის. ნეპალში სხვადასხვა ქვეყნიდან და საერთაშორისო ორგანიზაციიდან ჰუმანიტარული ტვირთი ყოველდღე ჩადის.

"ინტერპრესნიუსი"