ფილიპინებში ტაიფუნის შედეგად ორი ადამიანი დაიღუპა

ფილიპინებში ტაიფუნ "ნოულის" შედეგად ორი ადამიანი დაიღუპა, 10 000-ზე მეტი კი იძულებული გახდა საკუთარი სახლი დაეტოვებინა. ამის შესახებ "ენბისის" ცნობით, ფილიპინების კატასტროფების ეროვნული სამსახური იტყობინება. ათასობით ადამიანი დროებით თავშესაფრებს აფარებს თავს. მოსახლეობის დიდი ნაწილი ელექტროენერგიის გარეშეა დარჩენილი.

სტიქიის გამო ფილიპინების ჩრდილოეთ რეგიონში ათობით ავიარეისი გაუქმდა, შეჩერებულია საზღვაო მიმოსვლაც. ოკეანის სანაპიროზე უზარმაზარი ტალღები წარმოიშვა. ამ დროისათვის ქარის სიჩქარე საათში 120 კილომეტრს აღწევს. ტაიფუნი ახლა ბატანესის კუნძულებისკენ მიემართება, რის შემდეგაც იგი იაპონიას ემუქრება. მეტეოროლოგების ცნობით, ტაიფუნი ტოკიოს ოთხშაბათისთვის მიაღწევს.

"ინტერპრესნიუსი"