დაიწყო თუ არა დაპირისპირება გოგა ხაჩიძეს, მის ახალ თანაგუნდელებსა და "რუსთავი 2"-ს შორის?

საზოგადოების დიდი ნაწილის მოსაზრებით, "რუსთავი 2" "ენმ"-ს ("ერთიანი ნაციონალური მოძრაობა") პოლიტიკის მხარდამჭერი სატელევიზიო პლატფორმაა. ტელეკომპანიას ამ ბრალდებებს არა მხოლოდ მოქალაქეები, არამედ პოლიტიკოსებიც უყენებენ. მათ შორის მმართველი გუნდის წევრებიც, რომელთაც საკუთარი მოსაზრება არხის საინფორმაციო პოლიტიკის მიმართ "რუსთავი 2"-ს ღია ეთერშიც არაერთხელ გაუხმოვანებიათ.

და რა ხდება მაშინ, როდესაც ესა თუ ის პოლიტიკური ფიგურა "ენმ"-დან წასვლის გადაწყვეტილებას იღებს; კარგავს თუ არა ის ქვეყანაში ერთ-ერთი ყველაზე პოპულარული ტელევიზიის მხარდაჭერას, ამას "ენმ"-დან წამოსული ოთხეული ალბათ, ყველაზე უკეთ გასცემს პასუხს მომავალში. ამ დროისთვის არსებული მდგომარეობა კი გოგა ხაჩიძის სტატუსიდან ჩანს.

Facebook/ გოგა ხაჩიძე:

• "პეტრიაშვილზე მოვედი ამ წუთას. სადარბაზოს შემოსასვლელში "რუსთავი 2"-ს ჟურნალისტი დამხვდა ჩართული კამერით და კითხვით - ჩვენი ინფორმაციით, ამ წუთებში ზურა ჯაფარიძე ხვდება ირაკლი ღარიბაშვილს. ვუთხარი, რომ არა, ტყუილია, არც შეხვედრია და არც ამ წუთებში ხვდება. ამის შემდეგ შევედი ოფისში, სადაც ჯაფარიძე დამხვდა და თვითონ გასცა პასუხი ჟურნალისტს, ხვდებოდა თუ არა ამ წუთებში ღარიბაშვილს", - წერს ხაჩიძე (ხაჩიძის ეს სტატუსი გამოქვეყნებულია 13:30 წუთზე).

ამ კონტექსტში აღსანიშნავია ტელეკომპანია "რუსთავი 2"-ს გენერალური დირექტორის, ნიკა გვარამიას შეფასებაც, რომელიც გუშინ, 27 მაისს, ზურაბ ჯაფარიძის მიერ გამოქვეყნებულ განცხადებას მოჰყვა. გვარამიამ განცხადება, რომელშიც "ოთხეული" "ენმ"-დან წასვლის მიზეზებზე საუბრობდა, "უმესიჯო და უფორმო ტექსტად" მოიხსენია.

"სრული და უსიამოვნო მოულოდნელობაა. ასეთი უმესიჯო და უფორმო ტექსტი ალბათ მართლა რთული მოსაფიქრებელი იყო და ამისთვის აიღეს ორდღიანი ტაიმაუტი. ავტორზე რაკურსით თუ შევხედავთ, ტექსტი კი არა, ნამდვილი Mythbuster არის. - იმედგაცრუებული ვარ", - წერდა ნიკა გვარამია.

შეგახსენებთ, რომ პავლე კუბლაშვილმა, ზურაბ ჯაფარიძემ, გოგა ხაჩიძემ და გიორგი მელაძემ "ნაციონალური მოძრაობა" რამდენიმე დღის წინ დატოვეს. დღეს კი, თითოეულ მათგანს ყოფილი  თანაპარტიელისა და თანამებრძოლისგან, ჩიორა თაქთაქიშვილისგანაც მოუწიათ უსიამოვნო შეფასებების მოსმენა. თაქთაქიშვილმა "ოთხეულს" მოღალატეები, მხდალები და მშიშრები უწოდა.

ნახეთ| "ღალატით, სიმხდალითა და შიშითაა გაჟღენთილი ოთხეული" - ჩიორა თაქთაქიშვილი ყოფილ თანამებრძოლებზე

ზურა ნაკანი

AMBEBI.GE