უკრაინის პრეზიდენტმა ეკა ზღულაძის მორიგი კარიერული წინსვლა დააანონსა

უკრაინის პრეზიდენტი პეტრო პოროშენკო ქვეყნის პოლიციის ხელმძღვანელის პოსტზე უკრაინის შინაგან საქმეთა მინისტრის მოადგილეს, ეკა ზღულაძეს ხედავს. ამის შესახებ "უნიანის" ცნობით, პოროშენკომ უმაღლეს რადაში სიტყვით გამოსვლისას აღნიშნა.

"ახალი საპატრულო სამსახური, რომლის შექმნაშიც ეკა ზღულაძე იყო ჩართული, უკვე რამდენიმე კვირაში დაასრულებს გზებზე ფულის ლეგენდარული აღების ტრადიციას. დაწყებულია კანონების მიღება და შინაგან საქმეთა სამინისტროს რეფორმირების პროცესი. ერთმანეთისგან გამოიყოფა ძალოვანი სტრუქტურის პოლიტიკური ფუნქციები, შეიქმნება მუნიციპალური სამსახური და ახალი პოლიცია. მის მომავალ ხელმძღვანელად მე ვხედავ ზღულაძეს", - განაცხადა პოროშენკომ.

ეკა ზღულაძე უკრაინის შინაგან საქმეთა მინისტრის მოადგილედ გასული წლის ბოლოს დაინიშნა.

"ინტერპრესნიუსი"