აშშ-ის არმიის ვებგვერდზე კიბერთავდასხმა განხორციელდა

აშშ-ის არმიამ ოფიციალური ვებგვერდის მუშაობა დროებით შეაჩერა. "ბიბისის" ცნობით, ამის მიზეზი კიბერთავდასხმა გახდა. თავდასხმაზე პასუხისმგებლობა სირიის პრეზიდენტ ბაშარ ალ-ასადის მხარდამჭერმა არმიამ აიღო.

პენტაგონის პრესპიკერის განცხადებით, ისინი აკეთებენ ყველაფერს იმისათვის, რომ არმიის შესახებ მონაცემების გავრცელება არ მოხდეს. მსგავსი ინციდენტი აშშ-ში გასულ კვირასაც მოხდა. მაშინ ოფიციალურმა ვაშინგტონმა განაცხადა, რომ ჩინელმა ჰაკერებმა ფედერალური მთავრობის კომპიუტერებზე კიბერთავდასხმა განახორციელეს. თუმცა, ჩინურმა მხარემ ბრალდებები კატეგორიულად უარყო და მას "უპასუხისმგებლო და კონტრპროდუქტიული" უწოდა.

"ინტერპრესნიუსი"