საფრანგეთში მთელი ქვეყნის მასშტაბით უსაფრთხოების დასაცავად 10 ათასი სამხედრო ამოქმედდება

საფრანგეთის ხელისუფლება, პარიზის ტერაქტების შემდეგ, 10 ათასამდე სამხედროს ამოქმედებას აპირებს უსაფრთხოების უზრუნველსაყოფად. ამის შესახებ "ფრანსპრესი" ქვეყნის პრემიერმინისტრის გარემოცვიდან სანდო წყაროზე დაყრდნობით იუწყება.

ტერაქტების სერიებამდე საფრანგეთის მასშტაბით უსაფრთხოებას 7 ათასი სამხედრო იცავდა. "რაც შეეხება პარიზს, ტერაქტებამდე 4 ათასამდე სამხედრო იცავდა უსაფრთხოებას, დღის ბოლომდე კი მათი რიცხვი 5 ათასი გახდება", - განუცხადა სააგენტოს წყარომ და დასძინა, რომ მთლიანად ქვეყნის მასშტაბით, უსაფრთხოებას 10 ათასი სამხედრო დაიცავს.

პარიზში, 13 ნოემბრის ტერაქტების შედეგად, ბოლო ინფორმაციით, დაღუპულია 129 ადამიანი, 350-ზე მეტი კი დაშავდა.