თურქეთის საგარეო საქმეთა სამინისტრო სომხეთს მოუწოდებს, "ცეცხლს ნუ ეთამაშება"

თურქეთის საგარეო საქმეთა სამინისტრო სომხეთს მოუწოდებს, ცეცხლს ნუ ეთამაშება და დაიცვას ცეცხლის შეწყვეტის რეჟიმი აზერბაიჯანისა და სომხეთის ჯარების "შეხების ხაზზე".

სააგენტო "ტრენდის" ინფორმაციით, ამის შესახებ უწყების დღეს გაკეთებულ განცხადებაშია აღნიშნული.

დღესვე თურქეთის პრეზიდენტმა რეჯებ ტაიპ ერდოღანმა სომხეთ-აზერბაიჯანის კონფლიქტის დარეგულირების საკითხზე მომუშავე შუამავლების ქმედებები გააკრიტიკა. ამის შესახებ "ანადოლუ" იუწყება.

"სამწუხაროდ, ეუთო-ს მინსკის ჯგუფის თანათავმჯდომარეების უმოქმედობამ სომხეთ-აზერბაიჯანის კონფლიქტის საკითხში იმ სურათის წინაშე დაგვაყენა, რომელსაც ახლა ვუყურებთ. ამ ჯგუფს სამართლიანობის და კონკრეტული შედეგების უზრუნველყოფის მიზნით რომ ემოქმედა, არსებული ვითარება არ გვექნებოდა" , - განაცხადა ერდოღანმა.

ინტერპრესნიუსი