ჰაიტიზე ქარიშხლის შედეგად გარდაცვლილთა რაოდენობა 100-ს აჭარბებს

ჰაიტიზე ქარიშხლის შედეგად დაღუპულთა შესახებ სხვადასხვა მონაცემები ვრცელდება. "ფრანს-პრესი" შსს-ზე დაყრდნობით იუწყება, რომ სტიქიას 108 ადამიანი ემსხვერპლა. "როიტერი" კი ადგილობრივ ხელისუფლებაზე დაყრდნობით 136 დაღუპულზე წერს.

ქალაქ როშ-ა-ბატოში 50 ადამიანი დაიღუპა. ხელისუფლება ზოგიერთ რეგიონთან კავშირს ვერ ამყარებს.

ქარიშხალმა "მეთიუმ", რომელიც მეოთხე კატეგორიის შტორმად ითვლება, კუნძულს 5 ოქტომბერს გადაუარა. ქვეყნის რამდენიმე ნაწილი სტიქიის შედეგად ცივილიზაციას მოწყდა. დაინგრა დედაქალაქ პორტ-ო-პრენსთან დამაკავშირებელი მთავარი ხიდი. ათასობით ადამიანს კი საცხოვრებელი სახლის დატოვება მოუხდა.