შვედეთში სასკოლო ავტობუსის ავარიას სამი ადამიანი ემსხვერპლა

შვედეთის სამხრეთ-დასავლეთით, სასკოლო ავტობუსის ამოტრიალების შედეგად სამი ადამიანი დაიღუპა. ადგილობრივი მედიის ინფორმაციით, შემთხვევა 07:00 საათზე მოხდა, როდესაც ავტობუსის მგზავრთა უმეტესობას ჯერ კიდევ ეძინა. სკოლის მოსწავლეები მთაში დასასვნებლად მიემგზავრებოდნენ. ავტობუსის 59 მგზავრიდან 52 მოზარდი იყო.

მომხდარის შედეგად 30-მდე ადამიანი დაშავდა. ექვსი მათგანის მდგომარეობა მძიმეა. უცნობია, რა გახდა ავტოსაგზაო შემთხვევის მიზეზი. ავტობუსი სხვა სატრანსპორტო საშუალებას არ დაჯახებია.

ადგილზე სასწრაფო დახმარების ბრიგადები და მაშველები მუშაობდნენ. ყველა დაშავებული საავადმყოფოში მოათავსეს.