"ჯანმრთელი მამაკაცები 400 დოლარად!"-აუქციონზე მონებად მიგრანტებს ყიდიან

ლიბიაში მიგრანტებს მონებად აუქციონზე ყიდიან, ვიდეო რამდენიმე დღის წინ СNN-მა გაავრცელა.

კადრები, სავარაუდოდ, აგვისტოშია გადაღებული. ვიდეოში ჩანს, რომ ფერმაში სამუშაოდ აფრიკელ მიგრანტებს ყიდიან.

„ძლიერი ბიჭები! 400... 700... 800,“ - ასახელებს ვიდეოში მამაკაცი.

„სიენენის“ ინფორმაციით, მსურველებმა, საბოლოოდ, თითოეული მიგრანტი 400 დოლარად შეიძინეს. ლიბიის ხელისუფლებაში ამბობენ, რომ აუქციონის თაობაზე გამოძიებაა დაწყებული.

თანამედროვე მონობის გასაპროტესტებლად აქციები მსოფლიოს მასშტაბით მიმდინარეობს. გასულ კვირას მომხდარს დემოსტრაციით გამოეხმაურნენ პარიზსა და საფრანგეთის სხვა ქალაქებში. საკუთარი სოლიდარობა კი ლიბიელებმა სოციალურ ქსელებში გამოხატეს, ჰეშთეგით #LibyansAgainstSlavery.

მომხდარს გამოეხმაურა რამდენიმე პოლიტიკოსი. გაერო-ს გენერალურმა მდივანმა, ანტონიო გუტერესმა განაცხადა, რომ ნანახმა კადრებმა ძალიან შეაშფოთა.

„თანამედროვე მსოფლიოში მონობის ადგილი არ არის, ეს არის ადამიანის უფლებების ყველაზე შეუწყნარებელი დარღვევა,“ - განაცხადა მან და მოუწოდა საერთაშორისო საზოგადოებას, შეებრძოლონ მიგრანტების უფლებების უკიდურეს შელახვას.

მომზადებულია cnn.com-ის მიხედვით