ავიაიერიში და სახმელეთო შეტევა სირიაში: სამხედრო ოპერაცია - "ზეთისხილის რტო"

თურქეთის შეიარაღებული ძალები, სირიის ჩრდილოეთით მდებარე ქალაქ აფრინში დაწყებულ სამხედრო კამპანიას განაგრძობს. როგორც თურქული მხარე ირწმუნება, მათ ამერიკა უჭერს მხარს...

20 იანვარს განხორციელებული საჰაერო იერიშების შემდეგ, სამხედრო შენაერთებმა სახმელეთო ოპერაციაც დაიწყეს. ქურთთა "თავდაცვითი სახალხო შენაერთების" (YPG) ინტერნეტგვერდზე გავრცელებული მასალის მიხედვით, ორმხრივი შეტაკებების დროს დაიღუპა 4 თურქი ჯარისკაცი... თუმცა, მათივე ცნობით, მას შემდეგ, რაც სამხედრო მოქმედებებში ჯავშანტექნიკაც ჩაერთო, თურქეთის ქალაქ ქილისში დაღუპულია 10 მშვიდობიანი მოსახლე, მათ შორის, ბავშვიც... დანგრეულია შენობები და მოსახლეობას ჰუმანიტარული დახმარება სჭირდება.

გამოცემა Anadolu-ს ცნობით, თურქეთის სამხედრო ძალები ქალაქ აფრინში მძიმე ტექნიკისა და სპეციალური დანიშნულების რაზმის თანხლებით, 5 კილომეტრის რადიუსზე შევიდნენ და პოზიციები გაიმყარეს... მათივე ინფორმაციით, სერიოზული შეტაკებები ჯერჯერობით არ მომხდარა, თუმცა, ავიაციისა და არტილერიის დამსახურებით, ქურთების 153 პოზიცია და იარაღის რამდენიმე საწყობი გაანადგურეს.

რეჯეპ ტაიპ ერდოღანის მტკიცებით, სამხედრო ოპერაციაში სირიელი ქურთების წინააღმდეგ "სირიის თავისუფალი არმიაც" აქტიურად მონაწილეობს, რომელიც უკვე წლებია პრეზიდენტ ასადის წინააღმდეგ იბრძვის.

თურქული სახელმწიფო მედიის ინფორმაციით, ოპერაცია სახელწოდებით "ზეთისხილის რტო", თურქეთის საზღვარზე ტერორისტულ დაჯგუფებებთან საბრძოლველად შემუშავდა და მისი ერთ-ერთი მიზანია თურქეთისა და სირიის საზღვრის გასწვრივ შეიქმნას უსაფრთხოების 30 კილომეტრიანი ზონა.

თურქეთის პრემიერ-მინისტრის მოადგილე მეჰმეტ შიმშეკი ამბობს, რომ ოპერაცია ქვეყანაში ტერორიზმის რისკის შემცირებას ემსახურება.

მედიის ინფორმაციით, აფრინის აღმოსავლეთით "თავისუფალი არმიის" დაახლოებით, 15 000-მდე მებრძოლია მობიზილებული.

თურქეთის მხრიდან აფრინის მიმართულებით წარმოებულ ავიაიერიშს, მსოფლიოს არაერთი ქვეყანა გამოეხმაურა. ამერიკის შეერთებული შტატები, გერმანია და საფრანგეთი ანკარას მოუწოდებენ, სირიის ტერიტორიაზე ქურთების შეიარაღებული რაზმების წინააღმდეგ ოპერაცია შეწყვიტოს და მთელი ყურადღება "ისლამურ სახელმწიფოსთან" ბრძოლაზე გაამახვილოს.

საფრანგეთი, სირიაში არსებული ვითარების გამო, გაეროს უშიშროების საბჭოს საგანგებო სხდომის გამართვას ითხოვს. ამასთან, საფრანგეთის საგარეო საქმეთა მინისტრ ჟან-ივ ლე დრიანის განცხადებით, ცეცხლი დაუყოვნებლივ უნდა შეწყდეს და იმ ტერიტორიაზე შეუზღუდავი ჰუმანიტარული მოქმედებები უნდა დაიწყოს.

ფრანგი მინისტრის განცხადებას თურქეთში მყისიერი რეაქცია მოჰყვა. თურქეთის პირველი პირების თქმით, ეს განცხადება აუცილებლად აისახება თურქეთ-საფრანგეთის ურთიერთობაზე...

თურქეთის ქმედებებს მიუღებელს უწოდებს რუსეთიც. თავდაცვისა და უსაფრთხოების კომიტეტის საბჭოს პირველი მოადგილის, ფრანც კლინცევიჩის განცხადებით, რუსეთი ამ კონფლიქტის სამხედრო გზით მოგვარებაში ჩარევას არ აპირებს. "ამის შესახებ ფედერაციაში თანხმობაა და არ გადაიხედება," - აცხადებდა კლინცევიჩი.

მისივე თქმით, რუსეთი აპირებს, ამ მიმართულებით დიპლომატიურად იმოქმედოს. ის "გაიზიარებს გაეროს პოზიციას, დაამშვიდოს თურქეთი..." რუსი მაღალჩინოსანი თურქეთის ქმედებას, აფრინის მიმართულებით ავიადარტყმების განხორციელებასთან დაკავშირებით, - "სირიის სუვერინიტეტის პირდაპირ დარღვევად" მიიჩნევს...

ამასთან, რუსეთის თავდაცვის სამინისტროში აცხადებენ, რომ შესაძლო პროვოკაციების თავიდან ასაცილებად, რუსი სამხედროები აფრინიდან თელ-აჯარის რაიონში, იმ ზონაში დისლოცირდებიან, სადაც კონფლიქტი არ მიმდინარეობს.

თუმცა, ქურთთა "თავდაცვითი სახალხო შენაერთების" ლიდერები რუსეთს არ ენდობიან და ამ კონფლიქტში არც მისი "ნეიტრალური პოზიციის" სჯერათ. მათი განცხადებით, თურქეთის მხრიდან თავდასხმაზე პასუხისმგებლობა, რუსეთსაც ეკისრება.

ქურთების ვარაუდით, აფრინში, მათ პოზიციებზე ავიადარტყმები რუსეთთან შეთანხმებით განხორციელდა და შესაბამისად, ამ სამხედრო ოპერაციასა და აფრინში დაღუპულ მშვიდობიან მოსახლეობაზე, რუსეთიც არის პასუხისმგებელი, რომელიც ორმაგ თამაშს თამაშობს. ამის შესახებ ერაყის ქურთისტანის გამოცემა Rudaw იტყობინება...

საერთაშორისო ორგანიზაციები სირიიდან დევნილებს სამშობლოში დაბრუნებას, ჯერჯერობით არ ურჩევენ...

ქალაქი აფრინი ქურთების დე ფაქტო ავტონომიის ნაწილია, რომელიც სირიის ჩრდილოეთით მდებარეობს და თურქეთს ესაზღვრება. აქვე მოქმედებს "სახალხო თავდაცვითი შენაერთი"(YPG), რომელიც 2014 წლის შემდეგ, აქტიურად იბრძვის ISIS-ის წინააღმდეგ. თუმცა, ამის მიუხედავად, თურქეთი მას ტერორისტულ ორგანიზაციად მიიჩნევს და "ქურთისტანის მუშათა პარტიასთან" კავშირში ადანაშაულებს. ოპერაციის დაწყებამდე ერდოღანი აცხადებდა, რომ აშშ თურქეთის საზღვართან "ტერორისტული არმიის" შექმნას ცდილობს, რასაც თურქეთი არ დაუშვებს.

ლალი პაპასკირი

AMBEBI.GE