ქართველი მეცო-სოპრანოს ტრიუმფალური დებიუტი მადრიდის თეატრის სცენაზე - "ქარიშხალში" მთავარი პარტია ქეთევან ქემოკლიძემ შეასრულა

მადრიდის "ცარცუელას თეატრში" 90 წლის შემდეგ პირველად დაიდგა რუპერტო ჩაპის "ქარიშხალი", სადაც მთავარი პარტია მსოფლიოს სცენებზე წარმატებით მოღვაწე ქართველმა მეცო-სოპრანომ ქეთევან ქემოკლიძემ შეასრულა. 

ესპანურმა პრესამ ქართველი მომღერლის ამ საპასუხისმგებლო დებიუტს ტრიუმფალური უწოდა. 

ქეთევან ქემოკლიძე პირველი ქართველია, რომელიც წარსდგა მადრიდის "ცარცუელას თეატრის" სცენაზე. მას პარტინიორობას მსოფლიოში ცნობილი ესპანელი მომღერლები: კარლოს ალვარესი, ხოსე ბროსი, მარიონა კანტარერო და სხვები უწევდნენ.

სპექტაკლს ახლგაზრდა ესპანელი დირიჟორი გულიელმო გარსია კალვო დირიჟორობდა. წარმოდგენას განსაკუთრებული ელფერი შესძინა ლეგენდარულმა ესპანელმა მსახიობმა ხუან ეჩანოვემ ნარატორის როლში.