მოდერნიზაციის პროექტის ფარგლებში, ხარაგაულის სარკინიგზო გადასარბენზე სამუშაოები ჩატარდება

საქართველოს რკინიგზის მოდერნიზაციის პროექტის ფარგლებში, სალიანდაგო დეპარტამენტი ხარაგაულის სარკინიგზო გადასარბენზე ახალი ლიანდაგის გადართვით სამუშაოებს ჩაატარებს.

როგორც „ინტერპრესნიუსს“ „საქართველოს რკინიგზიდან“ აცნობეს, ხარაგაული-ძირულას ორკილომეტრიან სარკინიგზო მონაკვეთზე ხის შპალებს რკინა-ბეტონის ჩაანაცვლებს.

მათივე ინფორმაციით, 2018 წლის 12 აპრილს სამუშაოების ჩატარების მიზნით გამოყოფილი 8 საათიანი „ფანჯრის“ გამო, მსვლელობიდან მოიხსნება თბილისი-ქუთაისი-ოზურგეთის ჩქარი, ორჯგუფიანი მატარებელი #12/11(18/17) ორივე მიმართულებით. ასევე ორივე მიმართულებით მსვლელობიდან მოიხსნება ხაშური-ზესტაფონის (#6446/6445 და 6448/6447) საგარეუბნო მატარებლები.