დღის ფოტო: მინდელის შახტაში დაღუპულის ბიძა დაღუპულის ტანსაცმლით ხელში...

ტყიბულში, უბედური შემთხვევის ადგილიდან, ცხედრების გამოსაყვანად მინდელის შახტის სამთო მაშველები და საგანგებო სიტუაციების მართვის სამსახურის მაშველები მუშაობენ.

როგორც საგანგებო სიტუაციების მართვის სამსახურში აცხადებენ, ადგილზე იმყოფებიან იმერეთის სამხარეო სამაშველო ჯგუფები, ასევე, თბილისის სამაშველო ბაზიდან ტყიბულში უკვე გაემართა სამთო მაშველების 14-კაციანი ჯგუფი.

ტყიბულში, მინდელის შახტის ერთ-ერთ გვირაბში მოხდა კედლების დეფორმაცია, რასაც ჭერის ჩამოშლის მოჰყვა. ჩამონგრევის დროს, ამავე შახტაში მყოფმა სამთო ოსტატმა - 1963 წელს დაბადებულმა გ. ნ.-მ, სამთო მუშებმა: 1981 წელს დაბადებულმა ი. კ.-მ და 1963 წელს დაბადებულმა მ. ა.-მ ჯანმრთელობის დაზიანებები მიიღეს. ისინი ამ დროისთვის საავადმყოფოში არიან გადაყვანილი.

იხილეთ ვიდეო: ტყიბულის შახტში გარდაცვლილები ქუთაისის პროზექტურაში გადაასვენეს - რას ამბობენ ახლობლები?

AMBEBI.GE-ს კორესპონდენტის ინფორმაციით, უბედური შემთხვევის ადგილას შეკრებილნი არიან დაღუპულების ოჯახის წევრები და ახლობლები. ერთ-ერთი დაღუპულის ბიძამ, შახტაში დაღუპულის ტანსაცმელი გამოიტანა. მისი თქმით, დაღუპული დაახლოებით 12 წლის მანძილზე მუშაობდა მაღაროში.