ვარლამ ლიპარტელიანი - ამჟამად აქ მხოლოდ სპორტსმენები ვართ და მოვუწოდებ მხარდამჭერებსაც, რომ გვერდში დაგვიდგნენ

ძიუდოს ფედერაციაში ფედერაციის პრეზიდენტი დავით ქევხიშვილი ამ დრომდე არ გამოჩენილა. როგორც გაფიცული სპორტსმენები აცხადებენ, მათი აქცია სამუშაო დღის ბოლომდე გაგრძელდება.

"ჩვენი საპროტესტო აქცია გრძელდება დავით ქევხიშვილის გადადგომის მოთხოვნით. ამასთან, ველოდებით ფედერაციაში ვინმე პასუხისმგებელი პირის მოსვლას. ამჟამად ფედერაცია არ ფუნქციონირებს. სამუშაო ადგილზე არ იმყოფება არც პრეზიდენტი და არც გენერალური მდივანი. ჩვენ სამუშაო დღის ბოლომდე გავჩერდებით აქ", - განაცხადა ნაკრების კაპიტანმა ვარლამ ლიპარტელიანმა.

ამასთან, ლიპარტელიანი ძიუდოს მხარდამჭერებს სპორტსმენების გვერდში დგომისკენ მოუწოდებს.

"ამჟამად აქ მხოლოდ სპორტსმენები ვართ და მოვუწოდებ მხარდამჭერებსაც, რომ გვერდში დაგვიდგნენ", - განაცხადა ვარლამ ლიპარტელიანმა.

შეგახსენებთ, ძიუდოისტების ნაწილი ფედერაციასთან საპროტესტო აქციას დილიდან მართავს. მათ ფედერაციის პრეზიდენტის დავით ქევხიშვილის სამუშაო კაბინეტის კარი აჭედეს, დავით ქევხიშვილის სამუშაო სკამი გარეთ გამოიტანეს და ნაგვის ურნასთან დატოვეს.