რუსეთი შავ ზღვაში ახალ ფრეგატებსა და წყალქვეშა ნავებს აგზავნის

2020 წლამდე რუსეთის შავი ზღვის ფლოტს 15 ახალი გემი (ფრეგატი პროექტი 22350) და რამდენიმე დიზელის წყალქვეშა ნავი (პროექტი 677 ”ლადა”) შეემატება. ამის შესახებ რუსეთის სამხედრო საზღვაო ფლოტის მეთაურმა ვლადიმერ ვისოცკიმ  განაცხადა.

ადმირალის თქმით, შავი ზღვის ფლოტს თითო ფრეგატი და არაატომური წყალქვეშა ნავი უკვე ამ წელს შეემატება. მეთაურმა ასევე აღნიშნა, რომ შავ ზღვაში ახალ მცურავ საშუალებებს რუსეთის სხვა რომელიმე ფლოტიდან კი არ გადმოიყვანენ, არამედ ახალს შექმნიან.

როგორც ქვეყნის შეიარაღებულ ძალებში აცხადებენ, რუსეთს შავი ზღვის ფლოტის გაძლიერება ადენის ყურეში მეკობრეთა თარეშზე ოპერატიული რეაგირებისთვის სჭირდება, რაც სევასტოპოლის ფლოტიდან უფრო იოლი იქნება, ვიდრე ბალტიის.

მომზადებულია lenta.ru-ს მიხედვით.