ტყიბულში დაღუპული სანდრო ბუცხრიკიძე საკუთარი ხელფასით გაჭირვებულ ოჯახებს ეხმარებოდა

ტყიბულში დღეს დილით ქვანახშირის ღია მოპოვების კარიერზე ერთ-ერთი დაღუპული მუშა 27 წლის სანდრო ბუცხრიკიძე ტყიბულის თეატრის მსახიობი, საქართველოს წითელი ჯვრის ტყიბულის ადგილობრივი ორგანიზაციის წევრი და მოხალისე იყო. როგორც მისი მეგობრები ყვებიან, ახალგაზრდას უამრავი გატაცება და საქმიანობა ჰქონდა, იყო „ოკრიბელ სპელეოლოგთა კლუბის“ დამფუძნებელი, გატაცებული იყო სპელეოლოგიითა და ალპინიზმით.

სანდროს მეგობრები ამბობენ, რომ ის უაღრესად პატიოსანი, მშრომელი და კეთილშობილი ბიჭი იყო, ფიზიკურად მუშაობდა ნახშირის ღია მოპოვების კარიერზე და ტყიბულის შახტში. ბოლო 4 წელი წითელი ჯვრის აქტიური მოხალისე იყო.

სანდროს მეგობარი ხატია ჭელიშვილი გვიყვება:

„სანდრო საოცრად თბილი, მეგობრული ადამიანი იყო, კარგი მსახიობი და პარტნიორი სცენაზე. ის რამდენიმე ადგილას ფიზიკურად მუშაობდა, ქვანახშირის ღია მოპოვების კარიერზე და ტყიბულის შახტაში, მისი ხელფასით გაჭირვებულ ოჯახებს ეხმარებოდა.

რამდენიმე წელია, სანდროს მისივე ინიციატივით მარტოხელა მოხუცებისთვის, ვინც ტყიბულის უმწეოთა სასადილოში მისვლას ვერ ახერხებდა, სახლში მიჰქონდა ცხელი სადილი. ტყიდან ზურგით ეზიდებოდა გაჭირვებული ოჯახებისათვის შეშას, ის უამრავ სიკეთეს უანგაროდ აკეთებდა... მეგობრები ვეხუმრებოდით, რომ დედამიწაზე მოვლენილი კეთილი ანგელოზი იყო. ერთხელ გვითხრა - რა ვქნა აბა, როცა გარდავიცვლები, ის ხომ არუნდა თქვან, რომ ცხოვრება ძილში გაატარაო“ - იხსენებს ხატია ჭელიშვილი.

სანდრო ტყიბულში მშობლებთან ერთად ცხოვრობდა.

27 წლის ბიჭთან ერთად, კარიერში მომხდარ შემთხვევას 65 წლის რეზო ლომთაძე ემსხვერპლა. შემთხვევა ტყიბულში დღეს დილით, კერძო კარიერზე მოხდა, სადაც ღამისთევით რჩებიან მუშები. ადგილობრივების თქმით, სამი მუშა იყო ადგილზე, გამთენიისას გაზის სუნი იგრძნეს და ერთ-ერთი ჩავიდა შახტაში, კომპრესორის გასასწორებლად. როცა აღარ დაბრუნდა, მეორე, 27 წლის მუშა ჩავიდა და ორივე გაიგუდა გაზით.