რა ვითარებაა რუსთავში გუშინდელი სტიქიის შემდეგ

რუსთავში სტიქიის შედეგების სალიკვიდაციო სამუშაოები მთელი ღამის განმავლობაში მიმდინარეობდა და ამ დრომდე გრძელდება. ძლიერი წვიმისა და იაღლუჯის ფერდობიდან ჩამოსული ღვარცოფის გამო რუსთავში ცენტრალური ქუჩები, საცხოვრებელი სახლების პირველი სართულები, სარდაფები და კომერციული ობიექტები დაიტბორა.

განსაკუთრებით მძიმე სიტუაცია შარტავასა და მეგობრობის გამზირებზე, ასევე, თოდრიას, მესხიშვილის, ლეონიძის, ლესლიძისა და ტაბიძის ქუჩებზე იყო შექმნილი. დატბორილი სარდაფებიდან და საცხოვრებელი სახლებიდან ინტენსიურად მიმდინარეობს დაგროვილი წყლის ამოტუმბვა.

ადგილებზე მობილიზებული არიან რუსთავის მერიის ინფრასტრუქტურის სამსახურისა და "რუსთავსერვის ცენტრის" თანამშრომლები, აგრეთვე საგანგებო სიტუაციების მართვის სამსახურის მაშველები და დატბორილი სახლებიდან და ობიექტებიდან წყლის ამოტუმბვა მიმდინარეობს.