შეთავაზება, რომ "ვიზეარის" 2 ბილეთს 1 დოლარად იყიდით, ტყუილია

საიტი, რომელიც ავიაკომპანია WizzAir-ის ბილეთებს 1 დოლარად გთავაზობთ, სანდო არ არის და საეჭვო ანგარიშზე თანხა, უმჯობესია, არ გადარიცხოთ.

ბმული სოციალურ ქსელებში ვრცელდება და მასზე გადასვლის შემთხვევაში ვკითხულობთ, რომ ავიაკომპანიის 15 წლისთავთან დაკავშირებით 1 დოლარად ორ ბილეთის მიღების შანსი გვაქვს, თანაც - ნებისმიერი მიმართულებით. ამისთვის კი საჭიროა პასუხი გავცეთ სამ კითხვას და ბმული „ფეისბუქის“ გვერდზე გავაზიაროთ.

პირველი ეტაპის შემდეგ გადავდივართ შემდეგ ბმულზე, სადაც საკუთარი პირადი მონაცემები შეგვყავს, მათ შორის - ანგარიშის ნომერიც. ამასთან, საჭიროა 1 დოლარის გადახდა.

„ფეისბუქზე“ „შეთავაზებას“ აქტიურად განიხილავენ. როგორც ჩანს, 1 დოლარიანი ბილეთების მსურველი არც ისე ცოტაა. მათ, ვინც ანგარიშზე თანხა უკვე გადარიცხეს და თანაც, საკუთარი პირადი მონაცემებიც შეიყვანეს, „ფეისბუქზე“ ურჩევენ, ბარათზე არსებული თანხები, უსაფრთხოების მიზნით, მთლიანად მოხსნან.