ნოდიკო ტატიშვილის და სალომე ბაკურაძის დუეტი წლის სიმღერა გახდა - ვინ გახდნენ "ოქროს ტალღა 2018"-ის გამარჯვებულები

რადიოჰოლდინგ "ფორტუნას" გრანდიოზული ღონისძიება - "ოქროს ტალღა 2018" დასრულდა. დიდ საკონცერტო დარბაზში ქართული მუსიკის ზეიმი შედგა. 15 ნომინაციაში გამარჯვებულები გამოვლინდნენ, მათ შორის, მთავარი გამარჯვებული, წლის სიმღერის ტიტულის მფლობელები - ნოდიკო ტატიშვილი და სალომე ბაკურაძე გახდნენ დუეტისთვის "ერთხელ წვიმიან ქალაქში" (სიმღერის ავტორი: ლილიკო ნემსაძე, ტექსტის ავტორი: ირინა სანიკიძე).

15 ნომინაციიდან 14 კომპეტენტურმა ჟიურიმ ფარული კენჭისყრით გამოავლინა, მეთხუთმეტე - ინტერნეტრჩეული კი „ოქროს ტალღის“ საიტზე ხმის მიცემის შედეგებით გამოვლინდა და ის გიგი ადამაშვილია.

საღამოს სპეციალური სტუმარი ჰყავდა - "გრემის" ორგზის მფლობელი ამერიკელი შემსრულებელი, ლიზა ფიშერი, რომელმაც საქართველოს ეროვნულ სიმფონიურ ორკესტრთან (ნიკოლოზ რაჭველის ხელმძღვანელობით) კომპოზიციები შეასრულა და მაღალი საშემსრულებლო კლასი აჩვენა. კონცერტზე იმღერეს: ნანი ბრეგვაძემ, ეკა მამალაძემ, ნატალია ქუთათელაძემ, სტეფანე მღებრიშვილმა, ნინო ქათამაძემ, სოფო ნიჟარაძემ, „შვიდკაცამ,“ ნინა სუბლატმა...

"ოქროს ტალღა 2018"-ს ნომინაციები და გამარჯვებულები ასეთია:

• წლის დებიუტი: 17 და ლევან ბეიტრიშვილი – „იმიტომ რომ“ (სიმღერა და ტექსტი: ლევან ბეიტრიშვილი)
• წლის დუეტი: ვერიკო ტურაშვილი და თემო საჯაია – „თოვს“ (მუსიკისა და ტექსტის ავტორი: თემო საჯაია)
• წლის რიმეიქი, ანუ ახალი ვერსია: ლელა წურწუმია და გიორგი მახარაშვილი – „რა კარგი ხარ სიყვარულო“ (კომპოზიტორი: გოგი ცაბაძე / ტექსტი: მორის ფოცხიშვილი)
• წლის ჯგუფი და ანსამბლი: ანსაბლი "თეატრალურის კვარტეტი“ – წერილი (კომპოზიტორი: ჯემალ სეფიაშვილი / ტექსტი: პაატა ნაცვლიშვილი)
• წლის საუკეთესო ქალაქური სიმღერა: ლაშა ღლონტი – „შენ რომ დიდი იქნები“ (კომპოზიტორი: მამუკა ჩარკვიანი / ლექსი: ჯანსუღ ჩარკვიანი)
• ინტერნეტრჩეული: გიგი ადამაშვილი - "ქარი ქრის" (მუსიკის და ტექსტის ავტორი: ნატო ღოღობერიძე)
• წლის მუსიკალური ტელეპროექტი: „მხოლოდ ქართული“, სამაუწყებლო კომპანია „რუსთავი 2“.
• მუსიკალური პროდიუსინგი: გიორგი კერესელიძე, „ისთერნ პრომოუშენი“.
• ქართული მუსიკის პოპულარიზაცია ქვეყნის ფარგლებს გარეთ: ქეთი მელუა და „გორის ქალთა კამერული გუნდი“.
• რადიოჰოლდინგ „ფორტუნას“ რჩეული – სტეფანე მღებრიშვილი
• ტელეკომპანია Music Box-ის რჩეული – ვერიკო ტურაშვილი და თემო საჯაია – „თოვს“
• მუსიკის განვითარებაში შეტანილი განსაკუთრებული წვლილი – გიო ხუციშვილი
• წლის საუკეთესო მომღერალი მამაკაცი: თემურ თათარაშვილი – „გული ადამიანობს“ (მუსიკისა და ტექსტის ავტორი: ცირა ბზიშვილი)
• წლის საუკეთესო მომღერალი ქალი: სოფო ნიჟარაძე – „მე საიდუმლოს შენახვა ვიცი“ (კომპოზიტორი: გოგი ცაბაძე / ტექსტი: მორის ფოცხიშვილი)

სალომე ბაკურაძე, "ოქროს ტალღა 2018"-ის გამარჯვებული:

"იმდენმა ნომინაციამ ჩამიქროლა, კინაღამ ავიკაპიწე კაბა და სახლში წავედი. მთლად ცენტრალურ ნომინაციაში გამარჯვებას არ ველოდი. არადა, ძალიან გულით მინდოდა, ამ სცენაზე რაღაც ფორმით ვმდგარიყავი. მადლობა თითოეულ იმ ადამიანს, ვინც ეს გადაწყვეტილება მიიღო, რომ ასეთი სიხარული მამანიჭეს".

ნოდიკო ტატიშვილი, "ოქროს ტალღა 2018"-ის გამარჯვებული:

"დიდი მადლობა მინდა გადავუხადო რადიოჰოლდინგ `ფორტუნას~ ამ დღესასწაულისთვის, ვინც ამ მაგარ საღამო-დაჯილდოებაზე ზრუნავს, რაღაც ისე დაემთხვა, თამარ ჩიგოგიძემ, რადიოს ხელმძღვანელმა, `ოქროს ტალღის~ 5-წლიანი არსებობის ისტორიაში მეორედ გამომაცხადა. 5 წლის წინ, სოფო გელოვანთან ერთად და ახლა, ჩემს სალომე ბაკურაძეთან ერთად. ეს ლილიკო ნემსაძის მუსიკაა, ტექსტის ავტორი ირინა სანიკიძეა, მუსიკალური პროდიუსინგი ბორიკო შხიანს ეკუთვნის, ჩავწერეთ `ბრავო რეკორდში", ვიდეოს რეჟისორი ნესტან სინჯიკაშვილია, ვიდეოს პროდიუსერი კი თაკო დოლაბერიძე. ყველას დიდი მადლობა!"